މާލީ ވުޒާރާއިން ޝާޢިއުކުރަންޖެހޭ ހުރިހައި ރިޕޯޓެއް މިހާރު ޝާޢިއުކުރަމުންދާނެކަމަށް ފިނޭންސް މިނިސްޓަރ މޫސާ ޒަމީރު ވިދާޅުވެއްޖެއެވެ.

މިނިސްޓަރު މިފަދައިން ވިދާޅުވީ ރައްޔިތުންގެ މަޖިލީހުގެ ޖަލްސާގައި ގަލޮޅު އުތުރު ދާއިރާގެ މެންބަރު މުޙައްމަދު އިބްރާހިމް ކުރެއްވި ސުވާލަށް ޖަވާބު ދެއްވަމުންނެވެ.

މެމްބަރު ސުވާލު ކުރައްވާފައިވަނީ ދައުލަތުގެ އާމްދަނީއާއި ޚަރަދުގެ ތަފްސީލް ހިމަނައިގެން ކޮންމެ ހަފްތާއަކު "ވީކްލީ ފިސްކަލް ޑިވެލޮޕްމަންޓް" އަދި ކޮންމެ މަހަކު "މަންތްލީ ފިސްކަލް ޑިވެލޮޕްމަންޓްސް" ގެ ނަމުގައި 2018 ވަނަ އަހަރުގެ ނޮވެމްބަރ މަހުން ފެށިގެން ނެރެމުންދިޔަ މާލީ ހިސާބުތައް ނެރުން ހުއްޓާލީ ކީތްވެތޯއެވެ.

އެ ސުވާލަށް ޖަވާބު ދެއްވަމުން ފިނޭންސް މިނިސްޓަރު ވިދާޅުވީ ޖޫން މަހުގެ ތެރޭގައި ޕަބްލިކް އެކައުންޓްސް ރިކޮންސިލިއޭޝަން ކުރުމުގެ މަސައްކަތުގެ ޚަރަދު ރިކޯޑް ކުރުމުގައި ހުރި މައްސަލަތަކެއް ފާހަގަވެފައިވާކަމަށެވެ. އަދި ލޯނު ފަންޑެޑް އެކައުންޓްސްގެ ޑިސްބާސްމަންޓް އެކައުންޓިންގ ސިސްޓަމްގައި ރިކޯޑްކުރުމުގައި މިނިސްޓްރީން ގެންގުޅެމުންދިޔަ އުސޫލުތަކާއި ހުރި މައްސަލަތަކުގެ ސަބަބުން ފާއިތުވި އަހަރުތަކުގައި ހިނގާފައި ހުރި ޚަރަދުތައް މިއަހަރުގެ ބަޖެޓްގައި ރިކޯޑް ކުރެވިފައިވާކަމަށެވެ.

މީގެއިތުރުން ރިޕޯޓްތައް ޕަބްލިޝްކުރުން ހުއްޓާލީ މިސަބަބާ ހެދިކަމަށާއި އެއަށްފަހު ރަނގަޅަށް އެކައުންޓް ކުރާނީ ކިހިނެތްތޯ އޮޑިޓަރ ޖެނެރަލްގެ ލަފާ ހޯއްދެވިކަމަށް މިނިސްޓަރު ވިދާޅުވިއެވެ. އަދި މިހާރު މިނިސްޓްރީން ޕަބްލިޝްކުރާ އެއްވެސް ރިޕޯޓެއް ގަވާއިދުން ޕަބްލިޝްނުކުރެވި ނުހުންނާނެ ކަމަށް ވަނީ ވިދާޅުވެފައެވެ.

މިކަން އިތުރަށް ތަކުރާރުވިޔަ ނުދިނުމަށްޓަކައި މިހާރު އުސޫލުތަކެއް ކަނޑައަޅާފައިވާކަން ފާހަގަކުރައްވައި، މިނިސްޓަރު ޒަމީރު ވަނީ މިހާރު އެއުސޫލުތަކަށް ޢަމަލުކުރަމުން އަންނަކަމަށް ވެސް ވިދާޅުވެފައެވެ.