ނޭޝަނަލް ސޯޝަލް ޕްރޮޓެކްޝަން އޭޖެންސީ (އެންސްޕާ) އިން މަނީ ލޯންޑަރިންގ ހިންގާފައިވާ ކަމަށް ކުރީގެ ރައީސް އަބްދުﷲ ޔާމީން ތުހުމަތު ކުރައްވައިފިއެވެ.

އެމަނިކުފާނު މި ތުހުމަތު ކުރައްވާފައިވަނީ ޕީއެންއެފްގެ ފްރޮންޓް އޮފީހުގައި ބޭއްވި ޖަލްސާއެއްގައި ވާހަކަފުޅު ދައްކަވަމުންނެވެ.

ރައީސް ޔާމީން ވިދާޅުވީ އެންސްޕާއަކީ މޫކައި ސުއިޓްސްގައި ހިންގަމުން އައި ކުޑަ އޮފީހެއް ކަމަށެވެ. އަދި ބުރިތަކެއް ހިމެނޭ އިމާރާތެއް ކުއްޔަށް ހިފަން ޖެހޭ އެއްވެސް ސަބަބެއް ނެތް ކަމަށެވެ.

"އެއްބަސްވުން އުވާލިޔަސް މިއީ ކޮށްފައިވާ ހިޔާނާތް ފޮހެވިގެންދާނެ ކަމެއް ނޫން. މިއީ މަނީ ލޯންޑަރިންގގެ ޢަމަލެއް. މޯލްޑިވްސް މީޑިއާ ހައުސްގެ ވެރިފަރާތް ކަމަށްވާ މުއިއްޒު އަދާހަމައަށް މި ކުންފުންޏަކީ އޭނާގެ ނޫންކަން ރައްޔިތުންނަށް ސާފުކޮށްދޭންޖެހޭ." ރައީސް ޔާމީން ވިދާޅުވިއެވެ.

މީގެއިތުރުން މި މައްސަލާގައި އެންސްޕާގެ ސީއީއޯ ހީނާ ވަލީދުގެ މައްޗަށް މަނީ ލޯންޑަރިންގ ގެ ދައުވާ އުފުލަންޖެހޭ ކަމަށާއި މައްސަލައިގައި ޝާމިލުވާ އެންމެހާ ފަރާތްތައް މަގާމުތަކުން އިސްތިއުފާދިނުމަކީ އެންމެ ނަޒާހަތްތެރި ގޮތް ކަމުގައި ވެސް އެމަނިކުފާނު ވިދާޅުވިއެވެ.

ރައީސް ޔާމީން ވަނީ ބަޔާން ނެރުމަކުން ގޯސްކޮށް ކޮށްފައިވާ ކަންތައްތައް ރަނގަޅެއް ނުވާނެ ކަމަށާއި މިއީ ވަރަށް ބޮޑު މަނީ ލޯންޑަރިންގގެ މައްސަލައެއް ކަމަށް ވެސް ވިދާޅުވެފައެވެ.

މި މައްސަލަ ފެށިގެން އައީ އެންސްޕާ އިން އަލަށް ފަށާފައިވާ އެމްއެމް ޓީވީގެ ވެރި ކުންފުނި، މޯލްޑިވްސް މީޑިއާ ހައުސްގެ އިމާރާތުގެ ފްލޯތަކެއް ދިގު މުއްދަތަކަށް ކުއްޔަށް ހިފުމާ ގުޅިގެންނެވެ. އެހެންނަމަވެސް މިކަމާ ގުޅިގެން އުފެދުނު ފާޑުކިޔުންތަކާ ގުޅިގެން އެންސްޕާ އިން ވަނީ މި އެއްބަސްވުން އުވާލަން ނިންމާފައެވެ.