ޔޫ.އޭ.އީ އަކީ ރާއްޖޭގެ ތަރައްގީގައި މުހިންމު ބައިވެރިއެއް ކަމުގައި ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ އެގައުމުގެ ގައުމީ ދުވަހުގެ މުނާސަބަތުގައި އެގައުމުގެ ރައީސް، ޝައިޚް މުޙައްމަދު ބިން ޒާއިދް އަލް-ނަޙްޔާން އާއި އެޤައުމުގެ ނައިބު ރައީސް ޝައިޚް މުޙައްމަދު ބިން ރާޝިދު އަލް-މަޚްތޫމް އަށް ފޮނުއްވި ތަހުނިޔާގެ މެސެޖުގައެވެ.

ދެ ބޭފުޅުންނަށް ވަކިވަކިން ފޮނުއްވި މެސެޖުގައި ރައީސް ވަނީ ދެގައުމުގެ މެދުގައި އޮތް ޒަމާންވީ ރަހްމަތްތެރިކަމުގެ މައްޗަށް އަލިއަޅުއްވާލައްވާފައެވެ. އަދި އެގުޅުން އިތުރަށް ހަރުދަނާކުރުމަށް ރާއްޖެއިން އިސްކަންދެއްވާކަމަށް ވެސް ވިދާޅުވެފައިވެއެވެ.

މީގެއިތުރުން ޝައިޚް މުޙައްމަދު ބިން ޒާއިދް އަލް-ނަޙްޔާން އާއި އެގައުމުގެ ނައިބު ރައީސް ޝައިޚް މުޙައްމަދު ބިން ރާޝިދު އަލް-މަޚްތޫމަށް ފުރިހަމަ ސިއްހަތަކަށް އެދިވަޑައިގެން، ގައުމުގެ އަމާންކަމާއި ފާގަތިކަން ދެމެހެއްޓުމަށް ވެސް އެ މެސެޖުގައި ވަނީ އެދިވަޑައިގެންފައެވެ.