ވީލްޗެއަރ އެސޯސިއޭޝަން އޮފް މޯލްޑިވްސް އާއި ވާސޯ މެޑިކަލް ސެންޓަރ ގުޅިގެން، ބައިނަލްއަގްވާމީ ނުކުޅެދުންތެރިކަން ހުންނަ ފަރާތްތަކުގެ ދުވަސް ފާހަގަކުރުމަށް ހާއްސަ ހަވީރެއް ބާއްވައިފިއެވެ.

މި ހަވީރުގައި ރައްޔިތުންގެ މަޖިލީހުގެ ހުޅުމާލޭ އުތުރު ދާއިރާގެ މެމްބަރު ޙުސައިން ޝަރީފް އާއި ދިރާގު، އުރީދޫ، ދިވެހި ފުލުހުންގެ ހިދުމަތުގެ އަވައްޓެރި ޕޮލިސް އާއި ހެޔޮއެދޭ ގިނަ ފަރާތްތަކަކުން ވަނީ ބައިވެރިވެފައެވެ. އަދި ގިނަ އަދަދެއްގެ ކުދިންނާއި އެކުދިންގެ ބެލެނިވެރިން ވެސް ބައިވެރިވިއެވެ.

ވީލްޗެއަރ އެސޯސިއޭޝަން އޮފް މޯލްޑިވްސް (W.A.M) އިން އިންތިޒާމުކޮށް، ވާސޯ މެޑިކަލް ސެންޓަރުގެ އެހީތެރިކަމާއެކު ހުޅުމާލޭ ފޭސް 2 ގެ "ހިޔާ ޕާކު" ހިޔާޓަވަރު 7 ކައިރީގައި ބޭއްވި މި ހަވީރަކީ ނުކުޅެދުންތެރިކަން ހުންނަ ފަރާތްތަކަށާއި އެފަރާތްތަކުގެ ބެލެނިވެރިންނަށް އުފާވެރި، އެކުވެރި އަދި މަޖާ ވަގުތުކޮޅެއް ހޯދައިދީ، އެފަރާތްތަކަކީ ވެސް މުޖުތަމައަށް ބޭނުންތެރި ބައެއްކަން އަންގައިދިނުމަށް ބޭއްވި ހަރަކާތެކެވެ.

ވީލްޗެއަރ އެސޯސިއޭޝަން އޮފް މޯލްޑިވްސްގެ ޗެއަރޕާރސަން އަޙްމަދު ނަޖީބު ވިދާޅުވީ މިއީ އަދި ފެށުމެއް ކަމަށާއި ކުރިއަށް އޮތްތަނުގައި މިއަށްވުރެ އިތުރު ހަރަކާތްތަކާއި ނުކުޅެދުންތެރިކަން ހުންނަ ފަރާތްތަކަށް ބޭނުންވާނޭ ކަންކަން ކުރައްވަމުން ގެންދަވާނޭ ކަމަށެވެ. އަދި ނަމުގައި "ވީލްޗެއަރ" އޮތް ނަމަވެސް މިއީ ނުކުޅެދުންތެރިކަން ހުންނަ ހުރިހައި ފަރާތްތަކެއްގެ މަދަދުގާރު ކަމުގައި ވެސް ވިދާޅުވިއެވެ.

މި ހަވީރުގައި ދިރާގުގެ ފަރާތުން ބައިވެރިވެލެއްވި އޮފިޝަލް ވިދާޅުވީ އެ ކުންފުންޏަކީ މިފަދަ ކަންކަން ކުރުމުގައި އަބަދު ވެސް އެންމެ އިސް-ސަފުގައި ހަރަކާތްތެރިވާ ކުންފުންޏެއް ކަމަށެވެ. އަދި ވީލްޗެއަރ އެސޯސިއޭޝަނަށް އެ ކުންފުނީގެ ފުރިހަމަ އެއްބާރުލުން ދެއްވާނެކަމުގެ ޔަގީންކަން ވެސް ދެއްވިއެވެ.

ދިވެހި ފުލުހުންގެ ހިދުމަތުން ވިދާޅުވީ އެ އިދާރާ އަކީ ވެސް ނުކުޅެދުންތެރިކަން ހުންނަ ފަރާތްތަކަށް ވަަރަށްގާތުން އަބަދުވެސް އެހީތެރިކަން ފޯރުކޮށްދޭ އިދާރާއެއް ކަމަށެވެ. އަދި އެފަދަ ފަރާތްތަކަށް ބޭނުންވާނޭ އެހީތެރިކަން އިތުރަށް ދެނެގަނެ، މިހާރަށް ވުރެވެސް ގާތުން އެފަރާތްތަކަށް ހިދުމަތް ދިނުމަށް މަސައްކަތް ކުރައްވާނެ ކަމަށެވެ.

މީގެއިތުރުން އެފަދަ ފަރާތްތަކުގެ އާއިލާތަކާއި ބައްދަލުކޮށް، މަޝްވަރާކުރުމަށް ކުރިއަށް އޮތް ދުވަސްތަކުގައި މަސައްކަތް ކުރައްވާނެ ކަމަށް ވެސް ވިދާޅުވިއެވެ.

މިހަވީރުގައި ނުކުޅެދުންތެރިކަން ހުންނަ ކުއްޖެއްގެ މަންމައެއް ވާހަކަ ދައްކަމުން ވަނީ މިއީ ކޮންމެއަހަރެއްގެ ކަލަންޑަރުގައި އޮތަތީ، ފާހަގަކުރާ އެންމެދުވަހަކަށް ނުހެދުމަށް އެދިއެވެ. އަދި މިހާރަށްވުރެ ބޮޑަށް ސަރުކާރުގެ ތެރެއިން ވެސް މިފަދަ ކުދިންނަށް އެހީތެރިކަން ލިބޭނެ ގޮތް ހަދައިދިނުމަށް ވަނީ އެދިފައެވެ.

މީގެއިތުރުން ނުކުޅެދުންތެރިކަން ހުންނަ ފަރާތްތަކަށް ވެސް އަދާކުރެވޭނެ ވަޒީފާތައް ހުންނާނެކަން ފާހަގަކޮށް އެމަންމަ ވަނީ ގޭގައި ތިބެގެން ނުވަތަ ތަނަކަށް ގެންގޮސްގެން ވެސް އާމްދަނީއެއް ލިބޭނެ މަގު ފަހިކޮށްދިނުމަށް ވެސް އެދިފައެވެ.

މި ހަވީރުގައި ވަނީ ބައިވެރިވި ނުކުޅެދުންތެރިކަން ހުންނަ ހުރިހައި ކުދިންނަށާއި އެކުގައި އައި އާއިލާގެ ކުޑަ ކުދިންނަށް ހަދިޔާ ބަހާފައެވެ.