މޯލްޑިވްސް އިމިގްރޭޝަންގެ މުވައްޒަފަކަށް ކޮރަޕްޝަންގެ މައްސަލައެއް ސާބިތުވެއްޖެނަމަ އިތުރު ފުރުސަތެއް ނޯންނާނެ ކަމުގައި ކޮންޓްރޯލަރ ޖެނެރަލް އޮފް އިމިގްރޭޝަން، މުޙައްމަދު ޝަމްޢާން ވަހީދު ވިދާޅުވެއްޖެއެވެ.

ވީޓީވީގެ "ފަސްމަންޒަރު" ޕްރޮގްރާމުގައި ވާހަކަދައްކަވަމުން އެމަނިކުފާު ވަނީ މިފަހުން، އިމިގްރޭޝަނުން ކުރިއަށް ގެންދާ ބިދޭސީންނާ ގުޅުންހުރި މަސައްކަތްތަކުގައި، ފަސް މުވައްޒަފަކު ރިޝްވަތު ނެގި މައްސަލައެއް ފެންމަތިވެފައިވާކަން ފާހަގަކުރައްވާފައެވެ.

ޝަމްޢާން ވިދާޅުވީ، އިމިގްރޭޝަނުން ކުރަމުންދާ އެއްވެސް މަސައްކަތެއްގެ ތެރޭގައި ކޮރަޕްޝަންގެ އެއްވެސް ޢަމަލެއް ހިންގާނަމަ އެކަން ހުއްޓުވުމަށް ރައީސް ޑރ. މުޙައްމަދު މުއިއްޒު އިރުޝާދުދެއްވާފައިވާ ކަމަށެވެ.

އެ އިރުޝާދު އިމިގްރޭޝަންގެ ހުރިހާ އޮފިސަރުންނަށް ވެސް އަންގާފައިވާނެ ކަމަށާއި އެފަދަ ކަމެއް ސާބިތުވެއްޖެނަމަ އެ މުވައްޒަފަކަށް އިތުރު ފުރުސަތެއްދިނުން ނޯންނާނެކަން ވަރަށް ސާބިތުކަމާއެކު ޝަމްޢާން ފާހަގަކުރެއްވިއެވެ.

މަގާމާ ހަވާލުވެވަޑައިގެންނެވުމަށްފަހު، އިމިގްރޭޝަންގައި ހެދިފައިވާ ސްޓޭންޑަޑް އޮޕަރޭޓިން ޕްރޮސީޖަރ (އެސްއޯޕީ) ތަކާ އެއްގޮތަށް ސެކްޝަންތަކުގައި މަސައްކަތްކުރޭތޯ ބެއްލެވި ކަމަށާއި، ގިނަފަހަރު އެފަދަ ކުށެއް ކުރަން މަގުފަހިވަނީ ހަރުދަނާ އުސޫލުތަކެއް ނެތި، އެސްއޯޕީތަކާ އެއްގޮތަށް މަސައްކަތް ނުކުރެވޭތީކަން ޝަމްޢާން ފާހަގަކުރެެއްވިއެވެ.

އެހެންކަމުން އެސްއޯޕީތައް ރިވިއުކޮށް، ހެދިފައިވާ އެސްއޯޕީތަކާ އެއްގޮތަށް މަސައްކަތްކުރޭތޯ ޔަގީންކުރަން ހާއްސަ ޑިވިޝަނެއް ގާއިމްކޮށް، މުހިންމު މަސައްކަތްތަކެއް ކޮށްފައިވާނެކަމަށް ޝަމްޢާން ވިދާޅުވިއެވެ.

ޝަމްޢާން ވަނީ، މިހާރު ފެންމަތިވެފައިވާ މައްސަލައިގައި ޝާމިލުވާ އޮފިސަރުންގެ މައްސަލަ ތަހުގީގުކޮށް ނިމި، ދައުވާކޮށް، ޝަރުޢީ މަރުހަލާ ނިމެންދެން ވެސް ކަމާ ގުޅުންހުރި ފަރާތްތަކަށް ދޭންޖެހޭ ފުރިހަމަ އެއްބާރުލުން ދެއްވާނެކަމުގެ ޔަގީންކަމާއި، ކުށްވެރިވާ އޮފިސަރުންނަށް އަޅަންޖެހޭ ފިޔަވަޅުތައް އަޅުއްވާނެކަމުގެ ޔަގީންކަން ދެއްވާފައެވެ.