އައިއެލްޓީއެމް ކާންސް 2024 ގައި ރާއްޖެ އިޝްތިހާރުކުރަން ފަށައިފިއެވެ.

އިންޓަރނޭޝަނަލް ލަގްޒަރީ ޓްރެވަލް މާކެޓް (އައިއެލްޓީއެމް) ގެ ފްލޭގްޝިޕް ޝޯވ ގައި ރާއްޖެ އިޝްތިހާރުކުރުމުގައި ހަރަކާތްތެރިވަނީ މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) އިންނެވެ.

މިހިނގާ ޑިސެމްބަރ މަހުގެ 2 އިން 5 ގެ ނިޔަލަށް ފްރާންސްގައި ކުރިއަށްދާ މި ހަރަކާތުގައި ރާއްޖޭގެ ފަތުރުވެރިކަމުގެ ސިނާއަތުގެ 67 ކުންފުންޏެއްގެ 12 މަންދޫބުން ބައިވެރިވާކަމަށް ވަނީ އެމްއެމްޕީއާރްސީން ވިދާޅުވެއެވެ.

މިއީ ފްރާންސްގައި ބާއްވާ ޓްރެވަލް ޓްރޭޑް ފެއަރތަކުގެ ތެރެއިން ދުނިޔޭގެ އެންމެ ބޮޑު އެއް ލަގްޒަރީ ޓްރެވަލް ފެއަރ ކަމަށްވާއިރު، މި ހަރަކާތުގެ ސަބަބުން ބައިނަލްއަގްވާމީ މާކެޓްތަކުގެ ތެރެއިން ފްރާންސާއި އެހެން މާކެޓްތަކުގެ ލަގްޒަރީ ޓްރެވަލް ޓްރޭޑް މެންބަރުންނާއި ބައްދަލުކުރުމަށް އަގުހުރި ފުރުސަތުތައް ލިބޭނެކަމަށް އެމްއެމްޕީއާރުސީން ފާހަގަކުރައްވައެވެ.

އެގޮތުން ވިޔަފާރީގެ ބައްދަލުވުންތަކާއި ތައުލީމީ ސެޝަންތަކާއި ނެޓްވޯކިންގ އިވެންޓުތައް ކުރިއަށް ގެންދިއުމަށް މިއީ މުހިންމު ޕްލެޓްފޯމެއްކަން ވަނީ ފާހަގަކުރައްވާފައެވެ.

އައިއެލްޓީއެމް ކާންސް ގައި ރާއްޖޭގެ ސްޓޭންޑް ފަރުމާކުރެވިފައިވަނީ ރާއްޖޭގެ ލަގްޒަރީ ފަތުރުވެރިކަމުގެ ސިފަތަކާއެކުއެވެ. ރާއްޖޭގެ ރިސޯޓްތަކާއި ލިވަބޯޑްތައް އަދި ޔުނީކް ޖިއޮގްރަފީ ހިމެނޭގޮތަށް ފަރުމާކޮށްފައިވާ ރާއްޖޭގެ ސްޓޭންޑުން ލަގްޒަރީ އުފެންދުންތަކާއި ތަޖުރިބާތައް ވަރަށް ފުރިހަމައަށް ދައްކުވައިދޭނެކަމަށް އެމްއެމްޕީއާރުސީން ވިދާޅުވެއެވެ.