ނޭޝަނަލް ކެރިއަރ ސަރވިސެސް (އެންސީއެސް) ގެ އައުޓް ރީޗް ޕްރޮގްރާމެއް ބޭއްވުމަށް ވ. އަތޮޅުގައި ފަށައިފިއެވެ.

ސަސްޓެއިނަބަލް އެންޑް އިންޓެގްރޭޓެޑް ލޭބަރ ސަރވިސެސް (ސެއިލްސް) ޕްރޮޖެކްޓްގެ ފަރާތުން މި ޕްރޮގްރާމު ބާއްވަނީ އެ އަތޮޅު ކެޔޮދޫ އާއި ފެލިދޫގައެވެ.

މި ހިނގާ ޑިސެމްބަރ މަހުގެ 4 އަދި 5 ގައި ކުރިއަށްގެންދާ މި އައުޓް ރީޗް ޕްރޮގްރާމްގެ ދަށުން ޖޮބް ޕޯޓަލް މެދުވެރިކޮށް ވަޒީފާ ހޯދުމާއި ގުޅޭ އެކި ކަންކަންކުރުމަށް ޒުވާނުން އަހުލުވެރިކުރުވާނެއެވެ. އަދި ވަޒީފާގެ ފުރުސަތުތައް ފަހިކޮށްދިނުމަށް ކުރިވިދާނެ އިތުރު މަސައްކަތްތަކާއި ގުޅޭގޮތުން ވެސް މައުލޫމާތު ހިއްސާކުރެއެވެ.

މި ޕްރޮގްރާމްގެ ފުރަތަމަ ސެޝަން މިއަދު ހަވީރު 4 ޖެހިއިރު، ކެޔޮދޫގައި ވަނީ ބާއްވާފައެވެ. އަދި ފަހު ސެޝަން ކުރިއަށްގެންދިޔުމަށް ހަމަޖެހިފައިވަނީ ޑިސެމްބަރ 5 ވަނަ ދުވަހުގެ ހަވީރު 3 ން 4 ޖަހަންދެން ފެލިދޫގައެވެ.