އަދުގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރާއްޖޭގެ ވެރިކަމާއި ހަވާލުވެވަޑައިގެންނެވިއިރު، ރާއްޖޭގެ އިގްތިސާދީ ހާލަތު އޮތީ، ނާޒުކު ފައްތަރެއްގައިކަން އެއީ ދޮގުކުރެވެން ނެތް ހަގީގަތެކެވެ.

އެހެންކަމުން އެމަނިކުފާނަށް އެންމެފުރަތަމަ ވެސް ޖެހިވަޑައިގެންނެވީ ރާއްޖޭގެ އިގްތިސާދީ ހާލަތު ރަނގަޅުކޮށް، ރާއްޖެ ދަރާފައިވާ ދަރަނިތަކުން ސަލާމަތްވެ، ދިވެހީންނާއި ރާއްޖެ ސަލާމަތުގެ އައްސޭރިއަކަށް ގެންދާށެވެ.

އެމޭރުމުން މަސައްކަތް ފެއްޓެވީ ފައިސާ ޗާޕުނުކޮށް، ސަލާމަތުގެ އައްސޭރިއަށް ރާއްޖެ ގެންދިއުމަށެވެ. އަދި އެކަން ގެންދަވަނީ ހާސިލު ވެސް ކުރައްވަމުންނެވެ. ދަރަނިތައް އަދާކޮށް، ދަރަނި ދައްކަންޖެހޭ މުއްދަތު އިތުރުކުުރުން ފަދަ ކަންކަން ގައުމުތަކުގެ އިސްވެރިންނާ ޚުދު އެމަނިކުފާނު ވާހަކަފުޅު ދައްކަވައިގެން ހަމަޖައްސަވަމުން ގެންދަވަނީ ހިކުމަތު ޢަމަލީ ބޭނުންފުޅު ކުރައްވައިގެންނެވެ.

އެހެންނަމަވެސް އިދިކޮޅުގައި ތިބި ސިޔާސީ ފަރާތްތަކަށް އެކަން ބަލައިނުގަނެވި ނުވަތަ ހަޖަމު ނުކުރެވުމުގެ އަސްލަކީ ތަފާތުއެކި މަންސަތަކާއި އެކިގޮތްގޮތުން ރައްޔިތުންގެ ހިތްތަކުގައި ބިރުވެރިކަން އުފެދޭ ފަދަ ވާހަކަތައް ދައްކައި، ސަރުކާރާއިމެދު ރައްޔިތުންގެ މެދުގައި ނަފްރަތު އުފެއްދުމަށް މަސައްކަތް ކުރަމުން ދިއުމެވެ.

އެގޮތުން ބީއެމްއެލް އިން ޑޮލަރު ދޫކުރުމުގައި ގެނައި ބަދަލަކީ ބަޔަކު އަޑީގައި ތިބެގެން ކުރި ބަޣާވަތެއްގެ ގޮތުގައި ސިފަވާއިރު، އަނެއްކާ ވެސް މިވަނީ އެފަދަ މަންޒަރުތަކެއް ފެންނަން ފަށާފައެވެ. އަޑުތަކެއް ވެސް ފެތުރެން ފަށާފައެވެ.

އެއީ މި ސަރުކާރަށް އެއް އަހަރު ވާއިރަށް، އިދިކޮޅު ލީޑަރުން އެއްވެ، ރައްޔިތުން މަގުމަތީ ގަނަތެޅުވުމަށް އަނެއްކާ ވެސް އައު މަސައްކަތެއް މިވަނީ ފަށާފައެވެ. ގާނޫނުއަސާސީ ދިފާއު ކުުރުމުގެ ޒިންމާ ދައުލަތުގެ މައްޗަށް މާބޮޑަށް އޮތްއިރު، ގާނޫނުއަސާސީ ދިފާއުކުރުމުގެ ނަމުގައި ސީދާ އިދިކޮޅު ހަރަކާތް ހިންގަން ވަނީ ތައްޔާރުވެ، ނުވަތަ ފަށާފައެވެ.

ރައްޔިތުންގެ ނުތަނަވަސްކަން ހުރި ކަންކަން ފާހަގަކޮށް، އެކަންކަމުން ސިޔާސީ މަންފާ ހޯދުމަށް އެދަނީ ތައްޔާރުވަމުންނެވެ. މިއީ ހަމަޔަގީނުން ވެސް މިހާރުގެ ސަރުކާރާއިމެދު ރައްޔިތުންގެ މެދުގައި ނަފްރަތު އުފައްދައި، ރައްޔިތުން ބިރުވެރިކަމުގެތެރެއަށް ވައްޓައިލާ، ރައްޔިތުން ގަނަތެޅުވުން ނޫން އެހެންކަމެއް ނޫނެވެ.

ދިވެހީންނަކީ ތޫނުފިލި، ވިސްނޭ އަދި ކަންކަމަށް ލޯ ހުޅުވޭ ބަޔަކަށްވާއިރު، ސިޔާސީ މިފަދަ ލޮޅުންތަކަށް ވެސް ތިބޭނީ ލޯ ހުޅުވައިގެންކަން ކަށަވަރެވެ. އެކަމަކު ބައެއް ފަހަރަށް ދިމާވާ މައްސަލައަކީ އެފަދަ ފަރާތްތަކުގެ ސިކުނޑިއަށް ނުބައި ވަސްވާސް ލައިދީގެން، ނުބައި މަގުން ހިންގުވަނީއެވެ. ސިޔާސީ ފައިދާއަށްޓަކައެވެ. ވީމާ، މިކަމުގައި ދިވޭހީން އަބަދު ވެސް ތިބެން ޖެހޭނީ ވަރަށް ވިސްނައި، ހޭލައެވެ.