ކޮންމެ އިންވެސްޓްމަންޓެއްގައި ވެސް ލައިފްސައިކަލެއް އޮންނާނެ ކަމަށާއި އަޅުގަނޑުމެން މިހާރު މިތިބީ އެންމެ ފުރަތަމަ މަރުހަލާގައި ކަމަށް އެސްޓީއޯގެ ސީއީއޯ އަދި މެނޭޖިންގ ޑިރެކްޓަރ ޝިމާދު އިބްރާހިމް ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ ރާއްޖޭގެ ބަންކަރިންގެ ހިދުމަތާއި ގުޅޭގޮތުން 'އެކްސް' ގައި ކުރެއްވި ޕޯސްޓެއްގައެވެ.

އެ ޕޯސްޓުގައި ޝިމާދު ވިދާޅުވީ ދުނިޔޭގެ ޗާޓުގައި ރާއްޖެ އޮންނަ ސަރަހައްދުގެގޮތުން ބަންކަރިންގ ތަރައްގީވެ، ކުރިއަރާދާއިރު މިއީ ވަރަށް މުހިންމު ސިނާއަތަކަށް ވާނެކަމަށް ގަބޫލުކުރައްވާ ކަމަށެވެ.

ކޮންމެ އިންވެސްޓްމަންޓެއްގައިވެސް ލައިފްސައިކަލެއް އޮންނާނެ. އަޅުގަނޑުމެން މިހާރު މިތިބީ އެންމެ ފުރަތަމަ މަރުހަލާގައި. ރާއްޖެ އޮތް ތަނުގެ ގޮތުން މިކަން ތަރައްގީވެ ކުރިއަރާ ދާއިރު މިއީ ވަރަށް މުހިންމު ސިނާއަތަކަށް ވެގެންދާނެކަމަށް އަޅުގަނޑު ގަބޫލުކުރަން.https://t.co/wxi9kSace8

— Shimad Ibrahim (@sto_md) December 4, 2024

ރާއްޖޭގައި ބަންކަރިންގެ ހިދުމަތް ފަށާފައިވަނީ މިއަހަރުގެ ސެޕްޓެމްބަރ މަހުއެވެ. އިހަވަންދިއްޕޮޅުގައި ބައިނަލްއަގްވާމީ ބަންކަރިންގެ ހިދުމަތް ފެށުމަށް ސަރުކާރުން 15 އާއި 20 މިލިޔަން ޑޮލަރާ ދެމެދުގެ އަދަދެއް އިންވެސްޓްކޮށްފައިވެއެވެ.

ބަންކަރިންގެ ހިދުމަތް އެސްޓީއޯއިން ފޯރުކޮށްދެމުން އަންނައިރު، މި ހިދުމަތް ދެމުންދަނީ ބައިނަލްއަގްވާމީ ކުންފުންޏެއްކަމަށްވާ ވިޓޯލްއާ ގުޅިގެންނެވެ. މި ހިދުމަތް ދިނުމަށް އެސްޓީއޯއިން ގެނައި ދެ ބޯޓަކީ ގާތްގަނޑަކަށް 4،000 ޓަނުގެ ތެޔޮ އުފުލޭ ބޯޓުތަކެކެވެ.

އޮފްޝޯކޮށް ނުވަތަ ކަނޑުގައި އުޅަނދެއް ބާއްވައިގެން ހިދުމަތް ދޭ ގޮތަށް މި ހިދުމަތް ފެށިނަމަވެސް ސަރުކާރުގެ ވިސްނުމަކީ ބިން ހިއްކައިގެން ތެޔޮ ތާނގި ބަހައްޓައިގެން މި ހިދުމަތް ފޯރުކޮށްދިނުމެވެ.

ސަރުކާރުން ވިދާޅުވެފައިވަނީ މި ހިދުމަތާއެކު ރާއްޖޭގެ ޖީޑީޕީގެ ތެރެއަށް މުޅިން އަލަށް400 މިލިޔަން ޑޮލަރު ވަންނާނެކަމަށެވެ. އަދި 6 ބިލިޔަން ދިވެހި ރުފިޔާގެ މުޅިން އައު ސިނާއަތެއް އުފެދޭނެކަމަށެވެ.