ށ. ކޮމަންޑޫ ގޮނޑުދޮށް ހިމާޔަތްކުރުމަށް ރިވެޓްމަންޓް ކާބް ސްޓޯން ޖަހާ ނިމިއްޖެއެވެ.

މި މަސައްކަތްކުރާ ކުންފުނި އެމްޓީސީސީން ހާމަކޮށްފައިވާ ގޮތުގައި އެރަށު ގޮނޑުދޮށް ހިމާޔަތްކުރުމުގެ މަސައްކަތުގެ ދަށުން، ރިވެޓްމަންޓް ކާބް ސްޓޯން ޖެހުމުގެ މަސައްކަތުގެ 100 އިންސައްތަ މިހާރު ވަނީ ނިމިފައެވެ.

މީގެއިތުރުން ކޮމަންޑޫ ބަނދަރު ރެކްޓިފިކޭޝަންގެ ވޭރިއޭޝަން ފާސްވުމާއެކު، އެ މަސައްކަތް ފެށުމަށް އަންނަނީ ތައްޔާރުވަމުން ކަމަށް ހާމަކުރެއެވެ.

މަތިކޮމަންޑޫ ހިއްކުމުގެ މަޝްރޫއުގެ ދަށުން، ހިލައިގެ ރިވެޓްމަންޓްގެ މަސައްކަތް ފުރިހަމަކުރެވިފައިވާއިރު، މިވަގުތު ޖިއޯ ބޭގް ރިވެޓްމަންޓްގެ މަސައްކަތް ފެށުމަށްޓަކައި އެންމެހައި ތައްޔާރީތައް ވެސް ފުރިހަމަކުރެވިފައިވާ ކަމަށް އެ ކުންފުނިން ބުނެއެވެ.

ދެ ކޮމަންޑޫ ގުޅާލުމުގެ މަޝްރޫއުގެ ދަށުން ކޮމަންޑޫގައި 1690 ކިލޯމީޓަރުގެ ޝޯ ޕްރޮޓެކްޝަން ރެކްޓިފިކޭޝަންގެ މަސައްކަތާއި މަތިކޮމަންޑޫގައި 16.7 ހެކްޓަރުގެ ބިމެއް ހިއްކުމުގެ މަސައްކަތް ހިމެނެއެވެ. އަދި މަތިކޮމަންޑޫގައި 1،520 މީޓަރުގެ ބޮޑު ހިލައިގެ ތޮއްޓަކާއި ޖުމްލަ 353 މީޓަރުގެ ބޮޑުހިލައިގެ ފައިކަށި ޖެހުމަށް ވެސް ނިންމާފައިވެއެވެ.

މީގެއިތުރުން 112 މީޓަރުގެ ޖިއޯބޭގް ތޮށްޓެއް ގާއިމްކޮށް، 200 މީޓަރުގެ ދިގުމިނުގެ ލިންކަކުން ކޮމަންޑު އާއި މަތިކޮމަންޑޫ ހިއްކާ ސަރަހައްދު ގުޅާލުމަކީ ވެސް މި މަޝްރޫއުގައި ހިމެނޭ ކަމެކެވެ.

2022 ވަނަ އަހަރުގެ ޖެނުއަރީ މަހުގެ 12 ވަނަ ދުވަހު، އެމްޓީސީސީ އާ މި މަސައްކަތް ހަވާލުކޮށްފައިވަނީ ދެ އަހަރު ދުވަހުގެ ތެރޭ ނިންމާ ގޮތަށް،235.75 މިލިއަން ރުފިޔާއަށެވެ.