ސްޓެލްކޯ އިން ކުޑަކުދިންގެ ހަވީރެއް ބޭއްވުމަށް ނިންމައިފިއެވެ.

އެ ކުންފުނިން ވިދާޅުވީ މި ހަވީރު އޮންނާނީ ޑިސެމްބަރ 6 ވާ ހުކުރު (މާދަމާ) އެވެ.

މިއީ ސްޓެލްކޯ ބިޒްނަސް ސެންޓަރު އިމާރާތް ކުރުމުގެ މަސައްކަތް ނިންމުމާ ގުޅިގެން ބާއްވާ ހާއްސަ ހަވީރެކެވެ.

އެ ކުންފުނިން ވިދާޅުވީ ވޭތުވެދިޔަ 6 މަސްދުވަހު އެ ކުންފުނީގެ މުވައްޒަފުން ވަރަށް ބުރަކޮށް މަސައްކަތްކޮށް، ސްޓެލްކޯ ބިޒްނަސް ސެންޓަރު އިމާރާތް ކުރުމުގެ މަސައްކަތް ވަރަށް ފުރިހަމައަށް ނިންމާފައިވާ ކަމަށެވެ.

އެހެންކަމުން މިއީ އެ މުވައްޒަފުންގެ ހިތްވަރާއި ޖޯޝާއި މަސައްކަތުގެ ނަމޫނާ އަހްލާގު ފާހަގަކޮށް، އެ މުވައްޒަފުންގެ ހުނަރުވެރިކަން އެ މުވައްޒަފުންގެ އާއިލާތަކަށް ދައްކާލުމަށް ބާއްވާ ހަވީރެއް ކަމަށް ވެސް ސްޓެލްކޯ އިން ވަނީ ވިދާޅުވެފައެވެ.

މި ހަވީރު ބޭއްވުމަށް ނިންމާފައިވަނީ މާދަމާ ހަވީރު 4 ން އިރުއޮއްސި 6 ޖަހަންދެން އަދި ރޭގަނޑު 8 ން 9:30 އަށެވެ.

ސްޓެލްކޯ ބިޒްނަސް ސެންޓަރު އިމާރާތުގައި ކުރިއަށްދާ މި ހަވީރުގައި މެސްކޮޓާއި ކުޑަކުދިންނާ ގުޅޭ ކުޅިވަރުތައް ހުންނާނެ ކަމަށް އެ ކުންފުނިން ވިދާޅުވެއެވެ. އަދި ތަފާތު އެކި ހަރަކާތްތައް ވެސް ހުންނާނެކަމަށް ވެސް ވިދާޅުވިއެވެ.

އެކުންފުނިން އެކި މުނާސަބާ އާ ގުޅިގެން ވެސް ކުޑަކުދިންގެ ހަވީރު އަންނަނީ ބާއްވަމުންނެވެ. އަދި މިފަދަ ހަވީރުތަކަށް ބޮޑު ތަރުހީބެއް ވެސް މީގެކުރިން ވަނީ ލިބިފައެވެ.