2027 ވަނަ އަހަަރަށް ކުންފުނީގެ ދަރަނިތައް ދައްކާ ޚަލާސް ކުރެވޭނެކަމަށް ފެނަކަ ކޯޕަރޭޝަންގެ މެނޭޖިންގ ޑިރެކްޓަރ މުއާޒް މުޙައްމަދު ރަޝީދު ވިދާޅުވެއްޖެއެވެ.

އެމްޑީ މިފަދައިން ވިދާޅުވީ ޕީއެސްއެމްގެ 'ރާއްޖެ މިއަދު' ޕްރޮގްރާމުގައި ވާހަކަ ދައްކަވަމުންނެވެ.

މުއާޒު ވަނީ އައު މެނޭޖްމަންޓް ކުންފުންޏާ ހަވާލުވިއިރު ފެނަކައިގެ ދަރަނި 4.3 ބިލިޔަން ރުފިޔާއަށް އަރާފައިވާކަން ފާހަގަކުރައްވާފައެވެ. މީގެ ސަބަބުން ކުންފުނިން ކުރަންޖެހޭ ޚަރަދުތައް އިތުރުވެ، ކުންފުނީގެ މާލީހާލަތު ވަރަށް ބޮޑަށް ދަށްވެފައިވާކަން ފާހަގަކުރެއްވިއެވެ.

އެމްޑީ ވިދާޅުވީ މިކަން ހައްލުކުރުމަށް ސަރުކާރުން މިހާރު ދަނީ މަސައްކަތް ކުރައްވަމުން ކަމަށާއި އެ ކުންފުންޏަށް ދިމާވެފައިވާ މާލީ ހާލަތުން އަރައިގަތުމަށް ގެނެވިދާނެ ހައްލުތަކެއް އެބަހުރި ކަމަށެވެ. އެހެންނަމަވެސް ކުންފުންޏަށް ލިބޭ އާމްދަނީންއެކަނި އެކަން ނުކުރެވޭނެ ކަމަށް ވިދާޅުވިއެވެ.

" ނަރުދަމާއަކީ ރައްޔިތުންނަށް ހިލޭ ފޯރުކޮށްދޭ ޚިދުމަތަކަށްވީ ނަމަވެސް ބޮޑެތި ޚަރަދުތަކެއް ކޮންމެ މަހަކުވެސް ކުރަންޖެހޭ. އެކަމަށް އެކަށީގެންވާ ސަބްސިޑީއެއް ލިބެންޖެހޭ."މުއާޒް ވިދާޅުވިއެވެ.

މުއާޒް ވިދާޅުވީ ކުރީ ސަރުކާރުން ކުންފުންޏަށް ނުކަތާވަރަށް މުވައްޒަފުން ނަގައި ބޮޑު އިންޓްރެސްޓެއްގައި ލޯނުތައް ނެގުމާއި ނުދައްކާހުރި ތެޔޮ ބިލުތަކަށް ކޮންމެ މަހަކު ބޮޑު ހޭދައެއް ކުރަންޖެހޭ ކަމަށެވެ.

އެގޮތުން ކުންފުންޏަށް މަހަކު ޖުމްލަ 213 މިލިޔަނެއްހާ ރުފިޔާ ލިބޭއިރ،ު އިތުރަށް 85 މިލިޔަން ރުފިޔާ ޚަރަދުކުރަންޖެހިފައިވާ ކަމަށް ވިދާޅުވިއެވެ.