މާލެ ވޯޓަރ އެންޑް ސްވެރެޖް ކޮމްޕެނީ (އެމްޑަބްލިޔުއެސްސީ) އިން ބޮންޑު ވިއްކަން ނިންމައި، މޯލްޑިވްސް ސްޓޮކް އެކްސްޗޭންޖުގައި ހުޅުވާލައިފިއެވެ.

އެ ކުންފުނިން ވިއްކަން ނިންމާފައިވަނީ 400 މިލިއަން ރުފިޔާގެ ބޮންޑެވެ. އަދި މި ބޮންޑު ވިއްކަން ނިންމާފައިވަނީ ދެ މަރުހަލާއަކަށް ބަހާލައިގެންނެވެ.

އެގޮތުން މިހާރު ވިއްކަން ހުޅުވާލާފައިވާ 200 މިލިއަން ރުފިޔާގެ ބޮންޑުގައި އިންވެސްކުރާ ފަރާތްތަކަށް 5 އަހަރުގެ ތެރޭގައި އަހަރަކު 7.5 އިންސައްތަ އިންޓަރެސްޓް ލިބޭނެ ކަމަށް ބުނެފައިވެއެވެ.

އެމްޑަބްލިއުއެސްސީން ހާމަކޮށްފައިވާ ގޮތުގައި ބޮންޑު ވިއްކުމަށް ނިންމާފައިވަނީ އެކުންފުނިން ކުރިއަށްގެންދާ ފެނާއި ނަރުދަމާގެ މަޝްރޫއުތަކަށް ފައިސާ ހޯދުމަށެވެ.

އެގޮތުން މިހާރު އަތޮޅުތަކުގައި ކުރިއަށް ގެންދާ ފެނާއި ނަރުދަމާގެ މަޝްރޫއުތައް އަވަސްކުރުމާއި ކުންފުނިން އުފައްދާ ބައެއް ސާމާނުގެ ވިޔަފާރި ފުޅާ ކުރުން ހިމެނޭ ކަމަށް ބުނެފައި ވެއެވެ.