ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) އިން ފުއްޕާމޭގެ ބަލިތަކަށް ހާއްސަ ބޭހެއް ނެރެފިއެވެ.

އެ ކުންފުނިން މި ބޭސް ނެރެފައިވަނީ އެސްޓްރަޒެނަކައާ ގުޅިގެންނެވެ. އެއީ 2019 ވަނަ އަހަރު މުޅި ދުނިޔެއަށް ކުރިމަތިވި އާލަމީ ވަބާ، ކޮވިޑް-19 ގެ ބަލިމަޑުކަމަށް ހާއްސަ ވެކްސިން އުފެއްދި ކުންފުންޏެކެވެ.

މި ބޭސް ލޯންޗުކުރުމަށް އެސްޓީއޯ އިން ވަނީ ޑިސެމްބަރު 7 ވަނަ ދުވަހު ހާއްސަ ހަފުލާއެއް ބާއްވާފައެވެ.

ދަރުމަވަންތަ ހޮސްޕިޓަލުގައި ބޭއްވި ހާއްސަ ރަސްމިއްޔާތެއްގައި ވާހަކަ ދައްކަވަމުން ފުއްޕާމޭގެ ބަލިތަކަށް ހާއްސަ އިންޑިއާގެ ޑރ. ރެނިސް ޑޭވިސް ވަނީ ގްލޯބަލް އިނިޝިއޭޓިވް ފޮ އަސްތުމާ (ޖީނާ) އިން އެކުލަވާލާފައިވާ އަސްތުމާ އާއި ސީއޯޕީޑީ ބަލިތަކަށް ހާއްސަ ގައިޑްލައިންތަކުގެ މުހިންމުކަން ފާހަގަކުރައްވާފައެވެ.

މި ހަފުލާގައި އެސްޓީއޯ އިން ލޯންޗްކޮށްފައިވަނީ 'ސިމްބިކޯޓް ޓާބިއުހޭހަރ' އާއި 'ޕަލްމިކޯޓް ރެސްޕިއުލްސް' ކިޔާ ބޭސްތަކެކެވެ. މީގެތެރެއިން ސިމްބިކޯޓް ޓާބިއުހޭހަރއަކީ އިންހޭލަރއެކެވެ. އަނެއް ބޭހަކީ ދިޔާ ބޭހެކެވެ.

އެސްޓީއޯ އިން ވިދާޅުވީ ސިމްބިކޯޓް ޓާބިއުހޭހަރ އަކީ އެޑްވާންސްޑް ޑްރައި ޕައުޑަރ އިންހޭލަރއެއް ކަމަށާއި މިއީ އަސްތުމާ ނުވަތަ އެނޫން ވެސް ބައްޔެއްގެ ސަބަބުން ކުއްލިކުއްލިއަށް ނޭވާ ނުލެވޭ ހާލަތްތަކުގައި ބޭނުންކުރާ ބޭސްތަކަށްވުރެ މާ އަވަހަށް ފަރުވާ ލިއްބައިދޭ އެއްޗެއް ކަމަށެވެ.

މީގެއިތުރުން ޕަލްމިކޯޓް ރެސްޕިއުލްސްއަކީ ނޭވާލާ ހޮޅީގެ ތެރޭގައި އުފެދިފައި ހުންނަ ދަވަތައް ހަ މިނެޓު ތެރޭގައި ވިރުވާލަދޭނެ ބޭހެއް ކަމަށް އެ ކުންފުނިން ވިދާޅުވެއެވެ. އަދި މި ބޭހުގެ ސަބަބުން ވަރުގަދަ 'ޕަލްމޮނަރީ ވޭސޯކޮންސްޓްރިކްޓިވް' އަސަރެއް، ބޭސް ބުއިމުގެ 30 މިނެޓު ތެރޭގައި ކުރާ ކަމަށް ވަނީ ވިދާޅުވެފައެވެ.