ފަލަސްތީނުގެ ހައްޤުގައި ދިވެހި ރައްޔިތުން ކުރަމުންދާ މަސައްކަތާއި މެދު އެއްވެސް ބަޔަކު ސުވާލު އުފައްދާނެ ޖާގައެއް ނެތް ކަމަށް އެގައުމުން ރާއްޖެއަށް ކަނޑައަޅުއްވާފައި ހުންނަވާ ސަފީރު ވަލީދު އަބޫ ޢަލީ ވިދާޅުވެއްޖެއެވެ.

ޕީއެސްއެމް ނިއުސްއަށް ފޯނުން ދެއްވި ބަސްދީގަތުމެއްގައި އެމަނިކުފާނު ވަނީ އެކަމުގައި ރާއްޖެއިން ދައްކަނީ ދުނިޔެއަށް މިސާލެއްކަން ވެސް ފާހަގަކުރައްވާފައެވެ.

ރާއްޖެއަކީ ފަލަސްތީނުގެ ހައްގުގައި އަބަދުވެސް މަސައްކަތް ކުރަމުން އަންނަ ގައުމެއް ކަމަށާއި ރައީސް ޑރ. މުޢިއްޒު ވެރިކަމާއި ހަވާލުވެވަޑައިގެންނެވުމަށްފަހު، ރާއްޖެއިން ބައިވެރިވާ ބައިނަލްއަގްވާމީ ހުރިހައި ޕްލެޓްފޯމެއްގައި ވެސް ފަލަސްތީނުގެ ހައްގުގައި ވަކާލާތު ކުރައްވަމުން ގެންދަވާކަން ސަފީރު ވަނީ ފާހަގަކުރައްވާފައެވެ.

އެގޮތުން އ.ދ އާންމު މަޖިލީހާއި އެ ޖަމިއްޔާގެ އެކި މަންސަތަކާއި އައި.ސީ.ޖޭ އަދި އައި.ސީ.ސީ އަދި ބައިނަލްއަގްވާމީ އެހެން މަންސަތަކުގައި ވެސް ރާއްޖެއިން ކުރަމުންދާ މަސައްކަތަށް ފަލަސްތީނު ސަފީރު ވަނީ ތައުރީފް ކުރައްވާފައެވެ.