އއ. މަތިވެރީގައި ޒަމާނީ ފެންވަރުގެ އައު މިސްކިތެއް އަންނަ އަހަރު މެދުތެރޭ ބިނާކުރަން ފަށްޓަވާނެ ކަމަށް ރައީސް ޑރ. މުޙައްމަދު މުއިއްޒު ވިދާޅުވެއްޖެއެވެ.

ރައީސް މިހެން ވިދާޅުވީ ކ. އަތޮޅާއި އއ. އަތޮޅުގެ ބައެއް ރަށްތަކަށް ކުރައްވަމުން ގެންދަވާ ރަސްމީ ދަތުރުފުޅުގައި މަތިވެރިއަށް ޒިޔާރަތްކޮށް މަތިވެރީގެ ރައްޔިތުންނާއި ބައްދަލުކޮށް ދެއްކެވި ވާހަކަފުޅުގައެވެ. އެމަނިކުފާނު ވިދާޅުވީ މި ސަރުކާރުން ކަންކަން ކުރައްވަމުން ގެންދަވަނީ ވަކި ތަރުތީބެއްގެ މަތިން ކަމަށާއި، މިގޮތުން އެންމެ އިސްކަމެއް ދެއްވަނީ ރައްޔިތުންގެ ބޯހިޔާވަހި ކަމަށް ކަމުގައެވެ. އަދި އެއަށްފަހު ތައުލީމާއި ސިއްހަތާއި، ކުޅިވަރުގެ ވަސީލަތްތައް ގާއިމުކުރުމާއި ފެނާއި ނަރުދަމާއާއި މަގު ހެދުންފަދަ ކަންކަން ކުރެވިގެންދާނެކަމަށް ވިދާޅުވިއެވެ.

މަތިވެރީގައި މިހާރު ބޭނުންކުރަމުން އަންނަ އެންމެ ބޮޑު މިސްކިތަކީ މީގެ 30 އަހަރު ކުރިން ބޭނުންކުރަމުން އަންނަމުންދާ 250 އެއްހާ މީހުންނަށް ނަމާދުކުރެވޭ މިސްކިތެކެވެ. އަދި މިހާރު މި މިސްކިތުގެ ޖާގައިގެ ދަތިކަން ވަރަށް ބޮޑަށް ވަނީ ކުރިމަތިވެފައެވެ.

މަތިވެރީގައި އައު މިސްކިތެއް އިމާރާތް ކުރެވިގެންދިޔުމަކީ މަތިވެރީގެ ރައްޔިތުން މީގެ އެތަކެއް އަހަރެއްކުރިން ސުރެ ދެކެމުން އަންނަ ހުވަފެނެކެވެ. އަދި ކުރީގެ ސަރުކާރުތަކުގައި އައު މިސްކިތެއް އެޅުމުގެ ވާހަކަ ދައްކަމުން އައިސް މިއަދާ ހަމައަށްވެސް ނުވެފައިވާ ކަމެކެވެ.

މިސްކިތުގެ އިތުރުން އަންނަ އަހަރު މަތިވެރީގެ ބިން ހިއްކުމާއި، އެއަރޕޯޓެއް އެޅުމާއި، މަތިވެރި ކައުންސިލުގެ ގެސްޓްހައުސް "ކާސާމިޔާ" މަތިވެރި ރައްޔިތުންނަށް މަތިވެރި ކައުންސިލަށް އަނބުރާ ހޯއްދަވާ ދެއްވާނެކަމުގެ އުފާވެރި ޚަބަރުތައް ރައީސް ޑރ. މުހައްމަދު މުއިއްޒު މަތިވެރި ރައްޔިތުންނަށް ދެއްވާފައިވާކަން ފާހަގަކޮށްލެވެއެވެ.