މޯލްޑިވްސް އެސޯސިއޭޝަން އޮފް ޓްރެވަލް އޭޖެންޓްސް އެންޑް ޓުއަރ އޮޕަރޭޓަރސް (މާޓާޓޯ) އިން ބާއްވާ އެ ޖަމްޢިއްޔާގެ އަހަރީ އާޓް މުބާރާތާއި މައުރަޒުގައި ބައިވެރިވުމުގެ ފުރުސަތު ހުޅުވާލުމަށް ނިންމައިފިއެވެ.

"ފްރޭމް ބައި މަޓާޓޯ" ގެ ނަމުގައި ބާއްވާ މި މުބާރާތަކީ ދިވެހި އުފެއްދުންތެރިންގެ ހުނަރު ފާހަގަކޮށް، ފަތުރުވެރިކަމުގެ ދާއިރާ އިން ރާއްޖޭގެ މުއްސަނދި ސަގާފަތް ފަންނުވެރިން ބޭނުންކޮށްގެން ދައްކާލުމަށް ހާއްސަކޮށްގެން ބާއްވާ ހަރަކާތެކެވެ.

2025 ވަނަ އަހަރުގެ އެޑިޝަންއަށް ކަނޑައަޅާފައިވާ މައުޟޫއަކީ "ދަ މޯލްޑިވިއަން މިސްޓިކް" އެވެ. މި މުބާރާތުގައި ބައިވެރިވުމުގެ ފުރުސަތު ޑިސެމްބަރ 10 ން ފެށިގެން އަންނައަހަރުގެ ޖަނަވަރީ 20 ވަނަ ދުވަހަށް ހުޅުވައިލުމަށް ވަނީ ނިންމާފައެވެ.

މި މުބާރާތުގައި ހަތަރު އުމުރުފުރައެއްގެ ފަންނުވެރިންނަށް ބައިވެރިވެވޭއިރު، ހުށަހެޅޭ ފަންނުވެރިންގެ މަސައްކަތްތަކަށް ފަނޑިޔާރުކަން ކުރަނީ ރާއްޖެއާއި ރާއްޖެއިން ބޭރުގެ މާހިރުން ހިމެނޭ ޕެނަލައަކުންނެވެ.

މި ހުށަހެޅުންތަކުގެ ތެރެއިން ކޮންމެ އުމުރުފުރައަކުން 10 މަސައްކަތެއް ޝޯޓްލިސްޓްކޮށް، އަންނައަހަރުގެ ފެބްރުއަރީ މަހުގެ ނެޝަނަލް އާޓް ގެލެރީގައި ބޭއްވުމަށް ހަމަޖެހިފައިވާ މަޓާޓޯގެ އާޓް މައުރަޒުގައި ބައިވެރިކުރާނެއެވެ.

މަޓާޓޯގެ އާޓް މުބާރާތާއި މައުރަޒު ބާއްވަނީ ފަތުރުވެރިކަމާ ބެހޭ ވުޒާރާ އާއި މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) އާއި އެހެންވެސް ގިނަ ވުޒާރާތަކެއްގެ އެހީތެރިކަމާއެކުގައެވެ.

އެގޮތުން ޒުވާނުން ބާރުވެރިކުރުވުމާއި، މައުލޫމާތާއި ފަންނާ ބެހޭ ވުޒާރާ، ދިވެހިބަހާއި ސަގާފަތާއި ތަރިކައާ ބެހޭ ވުޒާރާ، ނޭޝަނަލް ސެންޓަރ ފޮރ ދި އާޓްސް (އެންސީއޭ)، މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ) ހިމެނެއެވެ. އަދި މޯލްޑިވިއަން އާޓިސްޓް ކޮމިއުނިޓީ (އެމްއޭސީ)، އަދި ނޭޝަނަލް ހޮޓެލްސް އެންޑް ގެސްޓްހައުސެސް އެސޯސިއޭޝަން އޮފް މޯލްޑިވްސް (އެންއެޗްޖީއޭއެމް) ގެ އެއްބާރުލުން ވެސް ލިބެއެވެ.

މި މުބާރާތާއިބެހޭ އިތުރު މަޢުލޫމާތު އަދި މަސައްކަތްތައް ހުށަހަޅާނެގޮތުގެ މައުލޫމާތު ހޯދުމަށް www.framebymatato.com އަށް ޒިޔާރަތްކޮށްލައްވާށެވެ.