ރަމަޟާން މަހު ބާޒާރުގެ އަގުތައް މައްޗަށްދިޔަނުދީ ހިފެހެއްޓުމާއި ގުޅޭގޮތުން މަޝްވަރާކޮށްފިއެވެ.

އިކޮނޮމިކް މިނިސްޓަރ މުޙައްމަދު ސައީދު އާއި އެސްޓީއޯގެ ސީއީއޯ އަދި މެނޭޖިންގ ޑިރެކްޓަރ ޝިމާދު އިބްރާހިމް ބޭއްވެވި މި ބައްދަލުކުރެއްވުމުގައި ރަމަޟާން މަހު ބާޒާރުގެ އަގުތައް މައްޗަށްދާ ސަބަބުތަކާއި އެކަމަށް ހައްލު ގެނެވޭނެ ގޮތްތަކާ ގުޅޭގޮތުން ވަނީ މަޝްވަރާކުރައްވާފައެވެ.

އެގޮތުން ކުރީއަހަރުތަކުގެ ތަޖުރިބާ އިން މި ރަމަޟާން މަހު ރަނގަޅުކުރެވިދާނެ ކަންކަމާ ގުޅޭގޮތުން ހިޔާލާއި މަޝްވަރާ ކުރެއްވިއެވެ. އަދި އަތްފޯރާ ފަށެއްގައި ކާބޯތަކެތި ލިބޭނޭ މަގުފަހިކޮށްދިނުމާ ގުޅޭގޮތުން މަޝްވަރާކުރެއްވިއެވެ.

މި ބައްދަލު ކުރެއްވުމުގައި އިކޮނޮމިކް މިނިސްޓްރީ އާއި އެސްޓީއޯގެ އިސްބައެއް ބޭފުޅުން ވެސް ބައިވެރިވެވަޑައިގަތެވެ.

އެސްޓީއޯ އިން ވިދާޅުވީ ރައީސް ޑރ. މުޙައްމަދު މުޢިއްޒު އެދިވަޑައިގަންނަވާގޮތަށް އެ ކުންފުނިން އަބަދު ވެސް މަސައްކަތް ކުރާނީ ކާބޯތަކެތި ވީހާވެސް ހެޔޮ އަގުގައި ފޯރުކޮށްދިނުމަށް ކަމަށެވެ. އަދި މި ރަމަޟާން މަހު ވެސް ރައްޔިތުންނަށް ބޭނުންވާ ތަކެތި ހުސްވިޔަނުދީ ލިބޭނޭ އިންތިޒާމު ހަމަޖައްސާނެ ކަމަށް ވެސް ވިދާޅުވިއެވެ.