މާލެއަތޮޅު ހިންމަފުށީގައި ވެމްކޯގެ ހިދުމަތް ރަސްމީކޮށް ފަށައިފިއެވެ.

މި ހިދުމަތް ރަސްމީކޮށް ފައްޓަވައިދެއްވީ އަތިއަތޮޅަށާއި މާލެ އަތޮޅުގެ ރަށްތަކަށް ރައީސް ޑރ. މުޙައްމަދު މުޢިއްޒު ކުރައްވަމުންގެންދަވާ ދަތުރުފުޅުގެ ތެރެއިން މިކަމަށްޓަކައި ބޭއްވި ހާއްސަ ހަފުލާއެއްގައެވެ.

ވެމްކޯ އިން ހިންމަފުށީގެ ގޭބިސީތަކުންނާއި ކޮންސްޓްރަކްޝަން ސައިޓްތަކާއި ވިޔަފާރިތަކަށް ވެސް ކުނި ނެގުމުގެ ހިދުމަތް ވެމްކޯއިން ފޯރުކޮށްދިނުމަށް ވަނީ ހަމަޖެހިފައެވެ.

ވެމްކޯގެ ހިދުމަތް މާލެއާއި އަތޮޅުތަކުގެ އެކި ހިސާބުތަކުގައި ވެސް ދެމުން އަންނައިރު، އޭގެތެރޭގައި ހދ. ކުޅުދުއްފުށި ސިޓީ ގދ. ތިނަދޫ ސިޓީ އަދި މާފުށި ހިމެނެއެވެ.

ސަރުކާރުން ވަނީ ރާއްޖޭގެ މީހުން ދިރިއުޅޭ ރަށްތަކަށް ދިމާވެފައިވާ ކުނީގެ މައްސަލައަށް ދާއިމީ ހައްލެއް ހޯދައިދީ ކުނި އުފައްދައި، ކުނި މެނޭޖްކުރާ ސަރަހައްދީ މަރުކަޒުގައި ކުނި ނައްތާލުމާ ހަމައަށް ވަށާޖެހޭ އަދި ތިމާވެއްޓާ ރައްޓެހި ގޮތަކަށް ކުނި މެނޭޖްކުރުމުގެ ގޮތުން ގައުމީ ޕްލޭނެއް އިފްތިތާހްކުރައްވާފައެވެ.

މި ޕްލޭންގެ ދަށުން ކުނި މެނޭޖްކުރުމުގެ ހާލަތު ވަޒަންކޮށް ރަނގަޅު ގޮތުގައި ކުނި މެނޭޖްކުރުމަށް އެޅިދާނެ ފިޔަވަޅުތައް ދެނެގަނެ އާންމުން ހޭލުންތެރިކުރުން ހިމެނެއެވެ.