ކަރަންޓު ބިލުގެ ޖޫރިމަނާ މައާފުކުރަން ދީފައިވާ މުއްދަތު ހަމަވަމުން އަންނަކަމަށް ސްޓެލްކޯ އިން ވިދާޅުވެއްޖެއެވެ.

އެ ކުންފުނިން މީޑިއާ އަށް ހާމަކުރެއްވި މެސެޖެއްގައިވަނީ އާންމު ދިރިއުޅުމަށް ބޭނުންކުރާ ހިދުމަތުގެ ކަރަންޓު ބިލުތަކަށް ޖޫރިމަނާގެ ގޮތުގައި އަރާފައިވާ ފައިސާ މައާފުކޮށް، ޖޫރިމަނާއާއި ނުލާ ފައިސާ ދެއްކޭނެ އިންތިޒާމަކީ ރައީސް ޑރ. މުހައްމަދު މުޢިއްޒުގެ ނިންމެވުމާ އެއްގޮތަށް ހަމަޖައްސާފައިވާ ކަމެއް ކަމަށެވެ. އަދި މިއަހަރުގެ އޭޕްރިލް ފުރަތަމަ ދުވަހުން ފެށިގެން އެ އިންތިޒާމު ހަމަޖެހިފައިވާ ކަމަށެވެ.

މައާފު ދިނުމަށް ނިންމާފައިވަނީ ޑޮމެސްޓިކް ކަސްޓަމަރުންނަށް ކަމަށްވާއިރު، ޖޫރިމަނާ މައާފުކުރެވޭނީ ފައިބެއަހަރުގެ ޑިސެމްބަރ 31 ގެ ނިޔަލަށް ހަދާފައިވާ ކަރަންޓު ބިލުތަކުގެ ތެރެއިން ފައިސާ ނުދައްކާހުރި ބިލުތަކަށް ކަމަށް ސްޓެލްކޯ އިން ހާމަކުރައްވައެވެ.

މީގެއިތުރުން ޖޫރިމަނާ މައާފުކުރެވޭނީ އެފަދަ ބިލުތަކުގެ ތެރެއިން ފައިސާ ނުދައްކާހުރި ބިލުތަކުގެ ޕްރިންސިޕަލް އަދަދު (ޖޫރިމަނާއާއި ނުލާ ބާކީ އަދަދު) ދެއްކުމުން ފައިބެއަހަރުގެ 31 ޑިސެމްބަރ ގެ ނިޔަލަށް ބިލަށް އަރާފައިވާ ޖޫރިމަނާ ކަމަށް އެ ކުންފުނިން ވިދާޅުވެއެވެ.

މި މުއްދަތުގެ ބިލުތަކަށްވާ ފައިސާގެ އަދަދު މިއަހަރުގެ ޑިސެމްބަރ 31 ގެ ނިޔަލަށް، ޖޫރިމަނާއާއި ނުލައި ދެއްކޭނެ އިންތިޒާމުވަނީ ހަމަޖެހިފައި ކަމަށް އެ ކުންފުނިން ހާމަކުރައްވައެވެ.

މިގޮތުން، ޖޫރިމަނާއާއި ނުލާ ބާކީ އަދަދު ދެއްކޭނެގޮތަށް ބިލުތަކަށްވާނީ ވަގުތީގޮތުން އެޖަސްމެންޓެއް ހިމެނިފައި ކަމަށާއި މި ބިލުތަކަށް މިއަހަރުގެ ޑިސެމްބަރ 31 ގެ ނިޔަލަށް ޔޫސޭޖް އަދަދު ދައްކާ ހަލާސްނުކުރެވޭނަމަ، މި ބިލުތަކުން އެޖަސްޓުކުރެވިފައިވާ ޖޫރިމަނާ އަދަދު އަލުން 01 ޖަނަވަރީ 2025 އިން ފެށިގެން ބިލުތަކުގައި ހިމަނާނެ ކަމަށް ވެސް ސްޓެލްކޯ އިން ވިދާޅުވެއެވެ.

މިކަމާއިގުޅޭ އިތުރު މައުލޫމާތު ހޯދުމަށް ހޮޓްލައިން 1545 ނުވަތަ billing@stelco.com.mv  އަށް އީ-މެއިލް ކުރުމަށް ސްޓެލްކޯ އިން އެދެއެވެ.