ކަސްޓަމްސް ސައުތު ރީޖަނަލް ހެޑް އޮފީސް އިމާރާތް އައްޑޫ ސިޓީ މަރަދޫގައި ރަސްމީކޮށް ހުޅުއްވައިދެއްވައިފިއެވެ.

މި އިމާރާތް ހުޅުއްވައިދެއްވީ ކަސްޓަމްސް ސައުތު ރީޖަނަލް ހެޑް އޮފީސް އިމާރާތުގައި ޑިސެމްބަރ 10 ވަނަ ދުވަހު ބޭއްވި ހާއްސަ ރަސްމިއްޔާތެއްގައި ކަސްޓަމްސްގެ މިނިސްޓަރ، މިނިސްޓަރ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީ ޢަލީ އިޙްސާން އަދި ކޮމިޝަނަރ ޖެނެރަލް އޮފް ކަސްޓަމްސް ފާޠިމަތު ދިޔާނާ އެވެ.

މި ރަސްމިއްޔާތުގައި، ކަސްޓަމްސްގެ މިނިސްޓަރ އަދި ކޮމިޝަނަރ ޖެނެރަލްގެ އިތުރުން ކޮމިޝަނަރ އޮފް ޕޮލިސް ޢަލީ ޝުޖާއު، އައްޑޫ ސިޓީގެ މޭޔަރ ޢަލީ ނިޒާރާއި، ރައްޔިތުންގެ މަޖިލިސްގައި އައްޑޫ ސިޓީ ތަމްސީލްކުރައްވާ މެމްބަރުން އަދި ކަސްޓަމްސް ގެ އިސްވެރިންނާއި އޮފިސަރުން ބައިވެރިވެ ވަޑައިގެންނެވިއެވެ.

ހޯމް މިނިސްޓަރ ޢަލީ އިހްސާން މި ހަފުލާގައި ވިދާޅުވީ އައްޑޫ ސިޓީގެ ވިޔަފާރިތައް ފުޅާވެ، އެކްސްޕޯޓް އިމްޕޯޓް ކުރާ މިންވަރު އިތުރުވެގެންދާއިރު، އައްޑޫ ސިޓީގައި މިގާއިމްކުރި ކަސްޓަމްސް ސައުތު ރީޖަނަލް ހެޑް އޮފީހުގެ ސަބަބުން، ކަސްޓަމްސް އިން ފޯރުކޮށްދޭންޖެހޭ ހިދުމަތްތައް އިތުރަށް ތަރައްގީވެގެންދާނެކަމުގައި ވިދާޅުވިއެވެ. އަދި މި އޮފީހުގެ ސަބަބުން އައްޑޫ ސިޓީގެ ވިޔަފާރި ބަނދަރުތައް ބެލެހެއްޓުން އިތުރަށް ހަރުދަނާ ވެގެންދާނެކަމަށް ވެސް ވިދާޅުވިއެވެ.

ކޮމިޝަނަރ ޖެނެރަލް އޮފް ކަސްޓަމްސް ފާޠިމަތު ދިޔާނާ ވިދާޅުވީ އަލަށް މި އޮފީސް އިމާރާތުގެ ސަބަބުން އައްޑޫ ސިޓީގައި ކަސްޓަމްސްގެ ހިދުމަތްތައް އިތުރަށް ހަރުދަނާވެ، ހިދުމަތްތައް އަވަސްވެގެންދާނެ ކަމަށެވެ. އަދި މި ސަރަހައްދުގައި ގާއިމްކޮށްފައިވާ ބަނދަރުތައް ބެލެހެއްޓުން އިތުރަށް ވަރުގަދަކުރެވިގެންދާނެ ކަމަށެވެ.

ކަސްޓަމްސް ސައުތު ރީޖަނަލް ހެޑް އޮފީސް އިމާރާތުގެ މަސައްކަތް 2021 ގައި އެސްޖޭ ޓްރޭޑް ޕްރައިވެޓް ލިމިޓެޑްއާ ހަވާލުކޮށްގެން ފެށިފައިވާއިރު، މި އިމާރާތް ގާއިމްކުރުމަށް 22.3 މިލިއަން ރުފިޔާ ދައުލަތުގެ ބަޖެޓުން ޚަރަދުކުރެވިފައިވެއެވެ. ތިން ބުރީގެ އިމާރާތުގައި އިދާރީ އޮފީހަކާއި، ސްޓާފް އެކޮމޮޑޭޝަން ބަޔަކާއި ރީޖަނަލް ޓްރޭނިންގ ސެންޓަރެއް ގާއިމްކޮށްފައި ވެއެވެ.