މޯލްޑިިވިއަން އިން ސީނުކަރައިގެ 4 ސިޓީއަކަށް ސީދާ ދަތުރުފެށުމަށް ތައްޔާރުވެއްޖެއެވެ.

ޗައިނާގެ ބެއިޖިންގައި ބޭއްވި ރަސްމިއްޔާތެއްގެ ތެރެއިން ހާމަކޮށްފައިވާ ގޮތުގައި މޯލްޑިވިއަންގެ ޑައިރެކްޓް ދަތުރުތައް ފެށުމަށް ހަމަޖެހިފައިވަނީ ބެއިޖިން، ޝަންހާއީ، ޗެންޑޫ، ޒިޔާންއަށެވެ. އަދި މިދަތުރުތައް އަންނަ މަހު ފެށުމަށް ދަނީ ތައްޔާރުވަމުންނެވެ.

މި ރަސްމިއްޔާތުގައި ޓްރާންސްޕޯޓު މިނިސްޓަރ މުހައްމަދު އަމީން ވިދާޅުވީ މި ދަތުރުތަކުގެ ސަބަބުން ފަތުރުވެރިކަމާއި ދަތުރުފަތުރުގެ ދާއިރާއިން ކުރިއެރުންތަކެއް ލިބޭނެކަމަށެވެ.

ދެ ގައުމުގެ ދެމެދުގައި ފަތުރުވެރިކަމާއި ވިޔަފާރީގެ ދަތުރުފަތުރު ކުރިއެރުވުމަށް ކުރެވިދާނެ ކަންކަމުގެ މައްޗަށް ތައްޔާރުކޮށްފައިވާ ޕްރެޒެންޓޭޝަނެއް ވެސް މި ރަސްމިއްޔާތުގައި ހުށަހަޅައިދީފައިވާއިރު، މޯލްޑިވިއަންގެ ފްލީޓަށް އިތުރުކުރަން ނިންމާފައިވާ ވައިޑް-ބޮޑީ އެއަރކްރާފްޓްގެ މައުލޫމާތު ވެސް ހިއްސާކޮށްފައި ވެއެވެ.

އަލަށް ފަށާ މި ދަތުރުތަކުގައިު ބޭނުންކުރާނީ އޭ330-200 ވައިޑް ބޮޑީ މަތިންދާބޯޓުކަމަށް ގައުމީ އެއަރލައިނުން ވަނީ ހާމަކޮށްފައެވެ.

މީގެއިތުރުންޔޫރަޕާއި އެފްރިކާގެ ގައުމުތަކަށް ވެސް މުސްތަގްބަލުގައި ދަތުރުތައް ފަށާނެކަން މޯލްޑިވިއަން އިން ވަނީ އިއުލާންކޮށްފައެވެ. އަދި މިކަމަށް ބޭނުންވާ އެޖެންޓުން އެގައުމުތަކުން ހޯދުމާއި ގުޅުންތައް ބަދަހިކުރުމުގެ މަސައްކަތްތައް ކުރަމުން އަންނަކަަމަށް ވެސް ހާމަކޮށްފައި ވެއެވެ.

މޯލްޑިވިއަނުން ބައިނަލްއަގްވާމީ ދަތުރުތައް މިހާރު ކުރަމުންދަނީ ޑާކާ، ޓްރިވެންޑްރަމް، ކޮޗިން، ބެންގަލޫރު އަދި ކޮލޮމްބޯއަށެވެ.