ބެޑްމިންޓަނަށް ދިމާވެފައިވާ މައްސަލަތަކަށް ހައްލު ހޯއްދަވައިދެއްވާނެ ކަމުގައި ސްޕޯޓްސް މިނިސްޓަރ ޢަބްދުﷲ ރާފިޢު ވިދާޅުވެއްޖެއެވެ.

ބެޑްމިންޓަން އެސޯސިއޭޝަންގެ ހިންގުމުގެ މައްސަލަތަކުގެ ސަބަބުން ގައުމީ ޓީމުތަކާއި، ކުލަބުތަކަށް އުނދަގޫތައް ކުރިމަތިވަމުން އަންނަ މި ދަނޑިވަޅުގައި މިނިސްޓަރު މިފަދައިން ވިދާޅުވެފައި މިވަނީ ރިވައިވަލް ސްޕޯޓްސްގެ ކުޅުންތެރިންނާ ބައްދަލުކުރައްވާ އެ ކުލަބުން ހުށަހެޅި ކަންބޮޑުވުންތަކާ ގުޅިގެންނެވެ.

މިނިސްޓަރު ވިދާޅުވީ ވީހާވެސް އަވަހަށް މި މައްސަލަތަކަށް ހައްލު ހޯއްދަވައިދެއްވާނެކަމަށެވެ.

ރިވައިވަލް ސްޕޯޓްސްގެ ކުޅުންތެރިން ވަނީ ދާދި ފަހުން ނިމުނު ޒެމްބިއާ އިންޓަރނޭޝަނަލް ޗެލެންޖާއި، ބޮސްޓްވާނާ އިންޓަރނޭޝަނަލް ޗެލެންޖުގައި ބޮޑެތި ކާމިޔާބީތަކެއް ހޯދާފައެވެ.

ޒެމްބިއާ މުބާރާތާއި ބޮޓްސްވާނާ މުބާރާތުން ރިވައިވަލް އިން ވަނީ ރާއްޖެ އަށް 8 މެޑަލް ހޯދައިދީފައެވެ. ޒެމްބިއާ މުބާރާތުން އަންހެން ޑަބަލްސް އިން ފާތިމަތު ނަބާހާ (ނަބާ) އާއި އައިމިނަތު ނަބީހާ (ނަބީ)ގެ ޕެއާ އިން ރަން މެޑަލް ހޯދިއިރު، މިކްސް ޑަބަލްސް އިން ޒަޔާން ޒަކީ އާއި ނަބާގެ ޕެއާ އިން ލޯ މެޑަލް އަދި އަންހެން ސިންގަލްސް އިން ނަބާ ވަނީ ލޯ މެޑަލް ހޯދާފައެވެ.

ބޮޓްސްވާނާ މުބާރާތުގެ އަންހެން ސިންގަލްސް އިން ނަބާގެ ރަން މެޑަލާއި ނަބީގެ ރިހި މެޑަލް އަދި މިކްސް ޑަބަލްސް އިން ޒަޔާން އާއި ނަބާގެ ރިހި މެޑަލް ހޯދިއެވެ. އަދި ފިރިހެން ޑަބަލްސް އިން ޒަޔާން ޒަކީ އާއި ނިބާލް އަހުމަދުގެ ޕެއާގެ ލޯ މެޑަލް ހޯދިއިރު، އަންހެން ޑަބަލްސްގައި ފާތިމަތު ނަބާހާ (ނަބާ) އާއި އައިމިނަތު ނަބީހާ (ނަބީ) ގެ ޕެއާ އިން ވަނީ ލޯ މެޑަލް ކާމިޔާބުކޮށްފައެވެ.