ޖުޑީޝަރީ މިނިވަންކޮށް ހިންގުމުގެ ފުރުސަތު އޮންނާނެ ކަމުގައި އެޓަރނީ ޖެނެރަލް އަލްއުސްތާޛު އަޙްމަދު އުޝާމް ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ އެމްޑީޕީން 'ގާނޫނު އަސާސީގެ ދިފާއުގައި' ގެ ނަމުގައި ޑިސެމްބަރ 10 ވަނަ ދުވަހުގެ ރޭ ބޭއްވި ޖަލްސާގައި ކުރީގެ ރައީސް އިބްރާހިމް މުޙައްމަދު ސާލިހު ދެއްކެވި ވާހަކަފުޅަކާ ގުޅިގެންނެވެ.

ރައީސް ސާލިހު ވިދާޅުވެފައިވަނީ ގާނޫނު އަސާސީއަށް ގެނައި ބަދަލުތަކުން ރައްޔިތުންގެ މަޖިލީސް ސަރުކާރުގެ ބާރުގެ ތެރެއަށް ގޮސްފައިވާ ކަމަށާއި ދެން ސަރުކާރުގެ އަމާޒަކަށް ވާނީ ސުޕްރީމް ކޯޓް ކޮންޓްރޯލް ކުރުން ކަމަށެވެ.

މިކަމާއިގުޅިގެން އޭޖީ ވިދާޅުވީ ސަރުކާރަށް އަހަރަކަށް ވުރެ ގިނަ ދުވަސްވީއިރު، އެއްވެސް މަތީ ކޯޓެއްގެ ފަނޑިޔާރަކަށް ފިޔަވަޅު އަޅާފައި ނޯންނާނެ ކަމަށެވެ. އަދި ސަރުކާރު އޮތީ ސަރުކާރުންވީ ވައުދުގެ މަތީ، ޖުޑީޝަރީ މިނިވަންކޮށް ހިންގަން ފުރުސަތު ދީގެން ކަމަށެވެ.

މީގެއިތުރުން ސުޕްރީމް ކޯޓުގެ ބެންޗު ކުޑަކުރުމަށް ނޫނީ ބޮޑު ކުރުމަށް ގާނޫނަށް އެއްވެސް ބަދަލެއް ގެނައުމުގެ އެއްވެސް މަސައްކަތެއް ކުރުމުގެ އެއްވެސް ވިސްނުމެއް ސަރުކާރުގައި ނެތް ކަމަށެވެ. އަދި އެފަދަ ބަދަލެއް ގެންނަން ސަރުކާރުގެ ލެޖިސްލެޓިވް އެޖެންޑާގައި ވެސް ނެތްކަމަށެވެ.