އެސްޓީއޯ ރޭޓުގައި މަސްވެރިންނަށް ތެޔޮ ވިއްކަން ފަށައިފިއެވެ.

އެ ކުންފުނިން ވިދާޅުވީ ތެޔޮ ވިއްކަން އަލަށް ފަށާފައި ވަނީ ކ. ހިންމަފުށި، ޅ. ފެލިވަރު، ސ. ހުޅުމީދޫ، އަދި ގއ. ކޫއްޑޫގެ ޖެޓީތަކުން ކަމަށެވެ.

މީގެއިތުރުން ރާއްޖޭގެ ކޮންމެ އަތޮޅެއްގެ މަދުވެގެން އެއް ރަށުން އެސްޓީއޯ ރޭޓުގައި، ފިޝަރީޒް މިނިސްޓްރީން "ފަހި ހަކަތަ" ޕޯޓަލް މެދުވެރިކޮށް މަސްވެރިންނަށް ތެޔޮ ލިބޭނެ އިންތިޒާމު ވެސް ހަމަޖައްސަމުންދާ ކަމަށެވެ.

އެ ކުންފުނިން ވިދާޅުވީ 2025 ގެ ނިޔަލަށް ރާއްޖޭގެ ކޮންމެ އަތޮޅެއްގައި ފިއުލް ސްޓޯރޭޖް ގާއިމްކޮށް، އެސްޓީއޯ ރޭޓުގައި ތެޔޮ ލިބޭނޭ އިންތިޒާމް ހަމަޖެއްސުމަށް މަސައްކަތް ކުރަމުންދާކަމަށެވެ.

ރާއްޖޭގެ ކޮންމެ އަތޮޅަކުން މަދުވެގެން އެއް ރަށުން، މަސްވެރިންނަށް އެސްޓިއޯ ރޭޓުގައި ތެޔޮ ވިއްކޭ އިންތިޒާމެއް ހަމަޖައްސައި ދެއްވުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދުފުޅެކެވެ.

އެގޮތުން ރައީސް މާލެ އަތޮޅުގެ ރަށްރަށަށް މިފަހުން ކުރެއްވި ދަތުރުފުޅުގައި ކ. ގާފަރަށް ވަޑައިގެން ދެއްކެވި ވާހަކަފުޅުގައި، އެ ހަތަރު ޖެޓީތަކުން އެސްޓީއޯ ރޭޓުން ތެޔޮ ވިއްކުމުގެ އިންތިޒާމުގެ އިތުރުން ކޫއްޑޫ އަދި ފެލިވަރުގައި ހުރި މިފްކޯގެ އުޅަނދުތަކުން ވެސް އެސްޓީއޯ ރޭޓުން މަސްވެރިންނަށް ތެޔޮ ވިއްކުމުގެ އިންތިޒާމް ހަމަޖައްސައިދިނުމުގެ މަސައްކަތް ކުރަމުންދާ ކަމަށް ވިދާޅުވިއެވެ.