ހައުސިންގ މިނިސްޓްރީ އާއި ކޮންސްޓްރަކްޝަން މިނިސްޓްރީ ހުންނަ އިމާރާތުގައި ރޯވި އަލިފާނުގެ ސަބަބުން ޓިނު ބިލްޑިންގ ވަރަށްބޮޑަށް އަނދާ ހުލިވެފައިވާ ކަަމަށް އެމްއެންޑީއެފް އިން ވިދާޅުވެއްޖެއެވެ.

އެ ހާދިސާގެ އަދާހަމަ ދެއްވަމުން އެ އިދާރާ އިން ވިދާޅުވީ އެ ބިލްޑިންގ ގެ 90 އިންސައްތަ އަލިފާން މިހާރުވަނީ ނިއްވާލާފައި ކަމަށެވެ. އަދި ގްރީން ބިލްޑިންގ ގެ 2 ވަނަ އަދި 3 ވަނަ ފަންގިފިލާ ގައި އަދިވެސް އަލިފާން ރޯވެފައިވާ ކަމަށެވެ.

މީގެއިތުރުން ޓިނު ބިލްޑިންގ ގެ ކުރިމައްޗަށްވާގޮތަށް ހުރި " މަހުމާ ވިލާ" ގައި ކޮންމެވެސް ވަރަަކަށް އަލިފާން ހިފައިފައި ވާކަމަށް ވަނީ ވިދާޅުވެފައެވެ.

އެމްއެންޑީއެފް އިން މީގެކުރިން ވިދާޅުވެފައިވަނީ އަލިފާން ރޯވެފައިވާ އިމާރާތުގެ ވަށައިގެންވާ އެހެން އިމާރާތްތަކުން މީހުން ހުސްކޮށްފައިވާ ކަމަށާއި މިހާރު ބޮޑަށް މަސައްކަތް ކުރަމުންދަނީ އެހެން އިމާރާތްތަކަށް އަލިފާން ފޯރިޔަ ނުދިނުމަށް ކަމަށެވެ.

މި އަލިފާން ނިއްވުމުގައި އެއަރޕޯޓުގެ ފަޔަރ ފައިޓަރސް ގެ އެހީތެރިކަން ވެސް ދަނީ ލިބެމުން ކަަމަށް ވެސް ވަނީ ވިދާޅުވެފައެވެ.

ހައުސިންގ މިނިސްޓްރީ ހުންނަ މ. ގްރީން ބިލްޑިންގ ގައި އަލިފާނުގެ ހާދިސާއެއް ހިނގުމާއި ގުޅިގެން ސަމާލުކަން ދޭންވީ ކަންތައްތައް އެޗްޕީއޭ އިން ވަނީ ހަނދާންކޮށްދެއްވާފައެވެ.

އެގޮތުން ކޮންމެހެން ނުކުންނަން ޖެހިއްޖެ ހާލަތެއްގައި މެނުވީ ދުމުގެ އަސަރުކޮށްފައިވާ ސަރަހައްދަކަށް ނުކުތުމުގެ ކުރިން އަނގައާއި ނޭފަތް ނިވާކުރުމަށާާއި އެންމެރަނގަޅު ގޮތަކީ ދުމުގެ އަސަރުކޮށްފައިވާ ސަރަހައްދަށް ނުނިކުތުން ކަމުގައި ވަނީ ވިދާޅުވެފައެވެ.

މީގެއިތުރުން ނޭވާލާ ނިޒާމާއި ހިތުގެ ބަލިތައް ހުންނަ ފަރާތަތްކަށް ދުމުގެ ސަބަބުން ކުރާ ނޭދެވޭ އަސަރު ބޮޑުވުން އެކަށީގެންވާ ކަމަށާއި ގޭގެ ދޮރުތަކާއި ކުޑަދޮރުތައް، ދުން ނުވަންނާނެހެން ބަންދުކުރުމަށް ވެސް އެ އިދާރާ އިން ވަނީ އިލްތިމާސް ކުރައްވާފައެވެ.

ނޭވާ ކުރުވުން، ނޭވާލާން އުނދަގޫވުން، ގަދަޔަށް ކެއްސުން އަދި ބޯ އެނބުރުން ފަދަ އަލާމާތެއް ފެނިއްޖެނަމަ ލަސްނުކޮށް ސިއްހީ އެހީތެރިއެއްގެ ލަފާ ހޯދުމަށް ވެސް އެޗްޕީއޭ އިން ވަނީ އިލްތިމާސް ކުރައްވާފައެވެ.