އަންހެނުން އިގްތިސާދީ ގޮތުން ބާރުވެރިކުރުމަކީ ސަރުކާރުން އެންމެ ބޮޑު އިސްކަމެއްދޭ އެއް އަމާޒު ކަމަށް ވަޒީރު ޑރ. ޢާއިޝަތު ޝިހާމް ވިދާޅުވެއްޖެއެވެ.

އެކަމަނާ މިހެން ވިދާޅުވެފައިވަނީ "އެމްޕަވަރިންގ ވިމެން އެންޓަޕްރެނަރސް ތްރޫ ޑިޖިޓަލް ޓްރާންސްފޮރމޭޝަން" ގެ ނަމުގައި މިއަދު ފެށުނު ތަމްރީން ޕްރޮގްރާމް އިފްތިތާހުކުރުމަށް ބޭއްވި ރަސްމިއްޔާތުގައެވެ.

މިއީ އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާގެ އިސްނެގުމުގެ މަތިން، ޔޫ.އެން އެސްކޭޕްގެ އޭޝިއަން އެންޑް ޕެސިފިކް ޓްރެއިނިންގ ސެންޓަރ ފޮރ އިންފޮމޭޝަން އެންޑް ކޮމިއުނިކޭޝާން ޓެކްނޮލޮޖީ ފޮރ ޑިވަލޮޕްމަންޓް (އޭޕީސީއައިސީޓީ) އާއި ގުޅިގެން ކުރިއަށްގެންދާ ޕްރޮގްރާމެކެވެ.

މިނިސްޓަރު ވިދާޅުވީ އަންހެނުންގެ ކުރިއެރުމަކީ އާއިލާތަކުގެ ކުރިއެރުން ކަމަށެވެ. އަދި އާއިލާތައް ކުރިއެރުމުން، މުޖުތަމަޢު ކުރިއަރައި، އިގްތިސާދު ވަރުގަދަވެގެން ދާނެ ކަމަށެވެ.

އެހެންކަމަށް ވުމާއެކު، ރައީސް ޑރ. މުޙައްމަދު މުޢިއްޒު އިސްނަންގަވައިގެން ހިންގަވާ މި ސަރުކާރުގެ މަޝްރޫއުތަކާއި މަސައްކަތްތަކުގައި އަންހެނުންނަށް އިތުރު ފުރުސަތުތައް ފަހިކޮށްދެއްވުމުގެ ގޮތުން ގިނަ ފިޔަވަޅުތަކެއް އަޅުއްވަމުންދާކަން ފާހަގަކުރެއްވިއެވެ.

އަންހެނުން އިސްވެ ހިންގާ ވިޔަފާރިތަކަށް އެހީތެރިވުމަށް މާލީ އެހީތެރިކަން ލިބޭނެ މަގުތައް އިތުރަށް ހަރުދަނާކުރުމުގައި ބޮޑެތި ކުރިއެރުންތަކެއް މި ސަރުކާރުން ހޯދާފައިވާކަން ވަޒީރު ވިދާޅުވިއެވެ.

މިގޮތުން އަންހެނުންނާއި އަންހެން ވިޔަފާރިވެރިން ބާރުވެރިކުރުމަށް، އެސް.ޑީ.އެފް.ސީ އާއި ގުޅިގެން "ފަށާ މަދަދު" ގެ ނަމުގައި އަންހެނުންނަށް ހާއްސަކޮށްގެން ސްކީމެއް ތައާރަފުކޮށް، މި ލޯން ސްކީމްގެ 25 އިންސައްތަ ނުކުޅެދުންތެރިކަން ހުންނަ އަންހެނުންނަށް ހާއްސަކުރެވިފައިވާއިރު، ނުކުޅެދުންތެރިކަން ހުންނަ 1 ފަރާތް ހިމެނޭގޮތަށް 60 ފަރާތަކަށް މި ލޯންސްކީމް ހަމަޖައްސައިދިނުމަށް ހޮވިފައިވާކަން ވަޒީރު ފާހަގަކުރެއްވިއެވެ.

މީގެއިތުރުން މި މަސައްކަތުބައްދަލުވުމަކީ ވަޒީފާގެ މައިދާނުގައި އަންހެނުންނަށް ހަމަހަމަ ފުރުސަތުތައް ހޯދައިދިނުމަށް ކުރާ މަސައްކަތުގެ މުހިންމު މައިލްސްޓޯނެއް ކަމަށް ވިދާޅުވިއެވެ. އަދި މި މަސައްކަތުބައްދަލުވުމަކީ އަންހެނުންގެ އިގްތިސާދީ ބާރުވެރިކަން ކުރިއެރުވުމަށް އަމާޒުކޮށްގެން މިހާ ބޮޑު ސްކޭލެއްގައި ބާއްވާ ފުރަތަމަ ޕްރޮގްރާމުކަން ވެސް ވަޒީރު ފާހަގަކުރެއްވިއެވެ.