އެއް އިންސާނަކާއި އަނެއް އިންސާނަކާ ދެމެދު އޮންނަ ގުޅުން ބަދަހިކުރުމަށްޓަކައި އެކަކު އަނެކަކާއި ސީދާ ބައްދަލުވުމަކީ ވަރަށް މުހިންމު ކަމެއް ކަމުގައި ރައީސް ޑރ. މުޙައްމަދު މުޢިއްޒުގެ އަނބިކަނބަލުން މެޑަމް ސާޖިދާ މުޙައްމަދު ވިދާޅުވެއްޖެއެވެ.

މާލެއަތޮޅު ހުރާގައި ހުރާ އެކުވެރި ހިޔާ" ހުޅުވައިދެއްވާ ދެއްކެވި ވާހަކައިގައި އެކަމަނާ ވަނީ އަޅުގަނޑުމެންގެ ޖީލު މިވަނީ ވަރަށް ބޮޑަށް ޑިޖިޓަލައިޒްވެފައި ކަމަށާއި އެކަކު އަނެކަކާއި ބައްދަލުވެ ވާހަކަދައްކާލުން މި އޮތީ ވަރޗުއަލް ކަމަކަށް ބަދަލުވެފައިކަން ފާހަގަކުރެއްވިއެވެ.

އެހެންކަމުން މިފަދަ ހިޔާއަކުން ގުޅުން ބަދަހިކުރުމަށްޓަކައި އެކަކު އަނެކަކާއި ސީދާ ބައްދަލުވެ، ގުޅުން ބަދަހި ކުރުމުގެ މަގުސަދު ހާސިލުވެގެންދާނެކަމުގައި އުއްމީދު ކުރައްވާ ކަަމަށް ވިދާޅުވިއެވެ. އަދި އެރަށަކީ ވަރަށް އެކުވެރި ރައްޔިތުންތަކެއް ދިރިއުޅޭ ރަށެއް ކަމަށާއި ހުޅުވިގެން ދިޔަ ބިނާގެ ސަބަބުން ރައްޔިތުންގެ މެދުގައި އޮތް އެކުވެރިކަމާއި ބަދަހިކަން އިތުރުވެގެންދާނެ ކަމަށް އުންމީދު ކުރައްވާކަމުގައި ވެސް ވިދާޅުވިއެވެ.

"ހުރާ އެކުވެރި ހިޔާ" އަކީ ރަށު ރައްޔިތުން އެއްތަންވެ، އެކުވެރިކަން އާލާކުރުމުގެ ބޭނުމުގައި އަޅާފައިވާ ބިނާއެކެވެ.

މިތަން ހުޅުއްވައިދެއްވުމަށްފަހު، މެޑަމް ސާޖިދާ ވަނީ މި ރަސްމިއްޔާތަށް ހާޟިރުވި ގިނަ އަދަދެއްގެ ރައްޔިތުންނާ ބައްދަލުކުރައްވައި، އެ ބޭފުޅުންނާއެކު "ހުރާ އެކުވެރި ހިޔާ"ގައި ވަގުތު ހޭދަކޮއްލައްވާފައެވެ.

"ހުރާ އެކުވެރި ހިޔާ" ހުޅުވުމަށް ބޭއްވި ރަސްމިއްޔާތަށް މެޑަމް އެރަށަށް ވަޑައިގަތުމުން ހޫނު މަރުހަބާއެއް ވަނީ ދަންނަވާފައެވެ.