ރައީސް ޑރ. މުޙައްމަދު މުޢިއްޒު، އަރިއަތޮޅު ދެކުނުބުރީ މަންދޫ ކައުންސިލާއި އެރަށު އަންހެނުންގެ ތަރައްގީއަށް މަސައްކަތްކުރާ (އ.ތ.މ.) ކޮމިޓީއާ ބައްދަލުކުރައްވައިފިއެވެ.

އެރަށު ކައުންސިލް އިދާރާގައި ބޭއްވެވި މި ބައްދަލުކުރެއްވުމުގައި އެރަށުގެ ތަރައްގީއަށް ބޭނުންވާ މުހިންމު ކަންކަމާގުޅޭގޮތުން ވަނީ މަޝްވަރާކުރައްވާފައެވެ.

އެގޮތުން މަންދޫ ކައުންސިލުން ވަނީ ފާއިތުވެ ދިޔަ އަހަރުތަކުގައި އެކި ސަރުކާރުތަކުން މަންދޫގައި މަޝްރޫއުތައް ހިންގާފައިވާލެއް މަދުކަން ފާހަގަކުރައްވާފައެވެ. އަދި މި ސަރުކާރުގެ ފަރާތުން އެހެންވިޔަ ނުދީ ގިނަ މަޝްރޫއުތައް ކުރިއަށްގެންދެވުމަށް އެދިވަޑައިގެންނެވިއެވެ.

މީގެއިތުރުން ރަށަށް އެންމެ ބޭނުންވާ ކަންކަމުގެ ގޮތުގައި ރަށުގެ ސުކޫލަށް އިތުރު ކްލާސް ރޫމް ބޭނުންވާ ކަމަށާއި، ސިއްހީ މަރުކަޒުގެ ހިދުމަތް އިތުރަށް ތަރައްގީކުރުމަށް ބޭނުންވާކަން ފާހަގަކުރެއްވިއެވެ. އަދި ރައްޔިތުން ބޭނުންވާ ގޮތަށް ބަނދަރު ތަރައްގީކޮށްދެއްވުމަށާއި، އޭ.ޓީ.އެމްގެ ހިދުމަތް ރަށުން ލިބުމަށް ބޭނުންވާކަން ވެސް ވަނީ ފާހަގަކުރައްވާފައެވެ.

މަންދޫ ކައުންސިލުން ވަނީ ރަށުން މާލެއަށް ފަސޭހަކަމާއެކު ދެވޭނެ އިންތިޒާމެއް ހަމަޖައްސަވައިދެއްވުމަށް ވެސް އެދިވަޑައިގެންނެވިއެވެ.

މި ބައްދަލުކުރެއްވުމުގައި ރައީސް ވިދާޅުވީ ވަޢުދުވެވަޑައިގެންފައިވާ ކަންކަން ކުރިއަށް ދާނެކަމަށެވެ. އަދި މުޅި ރާއްޖޭގައި އޭ.ޓީ.އެމްގެ ހިދުމަތް ތައާރަފުކުރުމުގެ މަޝްރޫއު ފެށިފައިވާކަން ފާހަގަކުރެއްވިއެވެ.

މި ބައްދަލުކުރެއްވުމުގައި ރައީސްގެ އަރިހުގައި ބައިވެރިވެވަޑައިގެންނެވި ވަޒީރުން ވަނީ މަންދޫގެ ތަރައްގީއަށް ކުރިޔަށްގެންދާ މަޝްރޫއުތަކުގެ އެންމެ ފަހުގެ މައުލޫމާތުތައް ހިއްސާކުރައްވާފައެވެ. އަދި ކައުންސިލުން ފާހަގަކުރެއްވި އެކި މަޝްރޫއުތަކުގެ އެންމެ ފަހުގެ މައުލޫމާތުވެސް ކަމާގުޅޭ ވަޒީރުން ހިއްސާކުރެއްވިއެވެ.