އަލިފާނުގެ ހާދިސާއިން ލިބުނު ގެއްލުން ފޫބެއްދުމުގެ މަސައްކަތް މާލެ ސިޓީގެ ވެރިންނާއެކު ކުރައްވަމުން ގެންދަވާކަމަށް، މާލެ ސިޓީގެ މޭޔަރ އާދަމް ޢާޒިމް ވިދާޅުވެއްޖެއެވެ.

މޭޔަރު މިފަދައިން ވިދާޅުވީ ހައުސިންގ މިނިސްޓްރީ ހުރި އިމާރާތުގައި ހިނގި އަލިފާނުގެ ހާދިސާއާ ގުޅިގެން އެތަނުބައި ހުރި ތިން އިމާރާތެއް އަނދާފައިވާއިރު، އެ އިމާރާތަށް ލިބުނު ގެއްލުމާ ބެހޭ ގޮތުން، ރާއްޖެ ޓީވީގައި ވާހަކަ ދައްކަވަމުންނެވެ.

އެންމެ މުހިންމު ކަމެއްގެ ގޮތުގައ އެއްވެސް މުއައްޒަފަކަށް އަނިޔާއެއް ނުވެ ސަލާމަތްވިކަން ފާހަގަކުރައްވައި، މޭޔަރު ވަނީ ގެއްލުންވެފައި ހުރި މިންވަރު އިނގޭނީ ރަނގަޅަށް އެސެސްކުރެވުނީމާކަން ފާހަގަކުރައްވާފައެވެ. އަދި ކުރިއަށް އޮތް ދެތިން ދުވަހެއްގެ ތެރޭގައި، އެ ކަން ދެނެގަނެވޭނެ ކަމަށް ވިދާޅުވިއެވެ.

" ދެން މުދަލަށް ވީ ގެއްލުން މި ދަނީ އެސެސްކުރަމުން. މާދަމާ ހިސާބުގައި މި ކަންތައް ވެސް ސާފުވެގެން ދާނެ." އާޒިމް ވިދާޅުވިއެވެ.

މީގެއިތުރުން މި ހާދިސާއިން ލިބުނު ގެއްލުންތަކުން އަރައިގުތަމަށް ކުރަންވީ މަސައްކަތްތަކާ ގުޅޭގޮތުން މާލެ ސިޓީ ކައުންސިލަރުންނާއި ވެރިންނާއެކު މަޝްވަރާ ކުރައްވަމުން ގެންދަވާކަމަށް ވިދާޅުވިއެވެ. އަދި މިވަގުތު ކުރަމުންދަނީ ސަލާމަތް ކުރެވުނު މައުލޫމާތު ދެނަގަތުމުގެ މަސައްކަތް ކަމަށާއި އޭރުން އަނދައިގެން ދިޔަ ރިކޯޑްތައް ދެނެގަނެވޭނެ ކަމަށް ވިދާޅުވިއެވެ.

މޭޔަރ ޢާޒިމް ވިދާޅުވީ އަލިފާނުގެ ހާދިސާއާ ގުޅިގެން، ނެތިގެންދިޔަ ރެކޯޑްތައް ހޯދުމުގައި، އާންމު ރައްޔިތުނާއި ޑިޕާޓްމަންޓް އޮފް ނެޝަނަލް ރެޖިސްޓްރޭޝަނާއި ކޯޓްތަކުގެ އެހީތެރިކަމާއި އެއްބާރުލުން ބޭނުންވާނެ ކަމަށެވެ.