ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، އދ. ދިއްދޫ ކައުންސިލާއި އެރަށު އަންހެނުންގެ ތަރައްގީއަށް މަސައްކަތްކުރާ (އ.ތ.މ) ކޮމިޓީގެ މެންބަރުންނާއި ބައްދަލުކުރައްވައިފިއެވެ.

ދަނގެތި ކައުންސިލުގެ އިދާރާގައި ބޭއްވެވި މި ބައްދަލުކުރެއްވުމުގައި ރަށުގެ ތަރައްގީއަށް ބޭނުންވާ ކަންކަމާ ގުޅޭގޮތުން ވަނީ މަޝްވަރާކުރައްވާފައެވެ.

މި ބައްދަލުކުރެއްވުމުގައި ކައުންސިލުން ވަނީ ރަށުގެ ރައްޔިތުންގެ ކަންބޮޑުވުންތަކާއި ރަށުގެ ތަރައްގީއަށް ބޭނުންވާ ކަންތައްތައް ރައީސް އާ ހިއްސާކުރައްވާފައި ވެއެވެ.

އެގޮތުން ބަނދަރުގެ މަޝްރޫއާއި ނެރު ފައިކަށި މަޝްރޫއު ކުރިއަށްގެންދިއުމުގައި ރައްޔިތުންގެ ހުރި ކަންބޮޑުވުންތައް ކައުންސިލުން ހިއްސާކުރެއްވިއެވެ. އަދި ރަށްގިރުމުގެ މައްސަލަ ވެސް ކައުންސިލުން ފާހަގަކުރެއްވިއެވެ.

މީގެއިތުރުން ކައުންސިލުން ވަނީ މިހާރު ކުރިއަށްދާ މަޝްރޫއުތަކާ ގުޅޭގޮތުން، ރައްޔިތުން ބޭނުންވާ ގޮތްތައް ތަފުސީލީ ގޮތެއްގައި ހިއްސާކުރައްވާއެވެ. އަދި ރަށުގައި ތައުލީމީ ދާއިރާގައި ހުރި ކަންބޮޑުވުންތައް ވެސް ކައުންސިލުން ވަނީ ހިއްސާކުރައްވާފައެވެ.

މި ބައްދަލުކުރެއްވުމުގައި ރައީސް ދެއްކެވި ވާހަކަފުޅުގައި ބަނދަރާއި ނެރުގެ މަޝްރޫއުގައި ކައުންސިލުން ފާހަގަކުރެއްވި ކަންކަން ވަރަށް ސީރިއަސްކޮށް ބައްލަވައި ދެމެހެއްޓިނިވި ގޮތެއްގައި އެކަންކަމަށް ހައްލު ހޯއްދެވުމަށް މަސައްކަތް ކުރައްވާނެކަމުގައި ވިދާޅުވިއެވެ.