ދިވެހީންގެ އެހީތެރިކަމާއެކު ތަންޒޭނިއާގައި އިތުރު މިސްކިތެއް ބިނާކޮށްފިއެވެ.

މިއީ ޚިދުމަތް ޖަމިއްޔާގެ ފަރާތުން ނިމިދިޔަ ރަމަޟާން މަހު ހުޅުވައިލި މިސްކިތު ފަންޑަށް ދިވެހި ލޮބުވެތި ރައްޔިތުން ދެއްވި ދީލަތި އެހީގައި ތަންޒޭނިއާގައި ބިނާ ކުރެވުނު ދެވަނަ މިސްކިތެވެ.

މި މިސްކިތް ހުޅުވި އަވަށަކީ މީގެކުރީން މިސްކިތެއް ހުންނަ އަވަށަކަށް ނުވާތީ، އެ އަވަށުގެ ރައްޔިތުން ޖަމާއަތުގައި ނަމާދުކުރުމަށް ދަނީ އެހެން އަވަށްތަކުގައި ހުންނަ މިސްކިތްތަކަށެވެ. ހާއްސަކޮށް ހުކުރު ނަމާދާއި އީދު ނަމާދުފަދަ ބޮޑުޖަމާއަތުގައި ކުރާ ނަމާދުތަކަށެވެ.

އެހެންކަމުން ޚިދުމަތް ޖަމިއްޔާއިން ވަނީ އެކަމަށް ވަރަށްބޮޑަށް ސަމާލުކަން ދީފައެވެ.

ސިޓީ ދަރަޖައިގެ ސަރަހައްދުތަކުގައި އާއްމުކޮށް މިސްކިތް ބިނާކުރުމަށް ކުރާ މަސައްކަތަށް ވުރެ މިކަހަލަ އަވަށްތަކުގައި ބިނާކުރާ މިސްކިތް ތަކަށް ކުރާ ހަރަދު އިތުރުވެ, މަސައްކަތަށް ބޭނުންވާ ސާމާނު އަވަށާއި ހަމައަށް ފޯރުކޮށްދިނުމުގައި އެތައް ގޮންޖެހުންތަކެއް ހުރިނަމަވެސް މިމަސައްކަތް ކާމިޔާބު ކަމާއެކީ ނިންމާ ލެވިފައިވާކަން ޚިދުމަތް ޖަމިއްޔާ އިން ވަނީ އުފަލާއެކު ފާހަގަކޮށްފައެވެ.

އެ މިސްކިތުގެ މަޝްރޫއު ނިންމައި، މިސްކިތް ހުޅުވުމުން އެ އަވަށުގެ ރައްޔިތުންގެ އިހްސާސްތައް ޚިދުމނަތް ޖަމިއްޔާގެ ފޭސްބުކް ޕޭޖުގައި ވަނީ ހިއްސާކޮށްފައެވެ.

މީގެއިތުރުން މިސްކިތް ބިނާކުރުމުގައި ދިވެހި ރައްޔިތުން ދެއްވި ދީލަތި އެހީތެރިކަމަށް އެ ޖަމިއްޔާ އާއި ތަންޒޭނިއާގެ އެ އަވަށުގެ ރައްޔިތުން ވަނީ ޝުކުރުއަދާކޮށްފައެވެ.