ކެއަރ ވޯކަރުންގެ ހުނަރު އިތުރުކުރުމުގެ ތަމްރީން ޕްރޮގްރާމެއް ފަށައިފިއެވެ.

މިއީ އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން އިސްނަގައިގެން އަމާން ވެށި، އަމާން ހިޔާ، ފިޔަވަތި އަދި އިޖުތިމާޢީ ޚިދުމަތްކުރާ މަރުކަޒުތަކުގެ ކެއަރ ވޯކަރުންނަށް އަމާޒުކޮށްގެން ކުރިއަށް ގެންދާ ޕްރޮގްރާމެކެވެ.

ފަސް ދުވަހުގެ މުއްދަތަށް ކުރިއަށްގެންދާ މި ތަމްރީން ޕްރޮގްރާމް ކުރިއަށް ގެންދިއުމަށް ހަމަޖެހިފައިވަނީމިއަދުން ފެށިގެން 19 ޑިސެމްބަރ ގެ ނިޔަލަށެވެ.

މިއީ ދައުލަތުގެ ބެލުމުގެ ދަށުގައިވާ ސްޓޭޓް ކެއަރތަކުގައި މަސައްކަތްކުރާ ކެއަރ ވޯކަރުންނަކީ ދައުލަތުގެ ބެލުމުގެ ދަށުން ބަލަހައްޓާ ފަރާތްތަކަށް ލޯތްބާއި ކުލުނާއެކު، ގާތުން އެހީތެރިކަން ފޯރުކޮށްދޭ ބަޔަކަށް ހެދުމަށް ބާރުއެޅުމަށް ކުރިއަށްގެންދާ ޕްރޮގްރާމެކެވެ.

މީގެއިތުރުން އެފަރާތްތަކަށް ބޭނުންވާ އިލްމާއި ތަމްރީނާއި ހުނަރު ފޯރުކޮށްދިނުމަކީ ވެސް ބޭނުމެކެވެ. އަދި ހިދުމަތުގެ ފެންވަރު ރަނގަޅުކޮށް، ހަރުދަނާ ގޮތެއްގައި ދައުލަތުގެ ބެލުމުގެ ދަށުގައިވާ ފަރާތްތައް ރައްކާތެރިކަމާއެކު ބެލެހެއްޓުމަށް ބާރުއެޅުމަކީ ވެސް މަގްސަދެކެވެ.

މިގޮތުން ކެއަރ ވޯކަރުން މިހާރު ކުރަމުން ގެންދާ މަސައްކަތްތައް އިތުރަށް ހަރުދަނާވެ، މިހާރު ދެވޭ ހިދުމަތުގެ ފެންވަރު ރަނގަޅުވެ، ހަރުދަނާ ގޮތެއްގައި ހިދުމަތްތައް ފޯރުކޮށްދިނުމަށް މި ތަމްރީނުގެ ސަބަބުން މަގުފަހި ވެގެންދާނެއެވެ.

މި ތަމްރީން ޕްރޮގްރާމްގައި ބ، ހދ، ލ، ނ، ދ، ށ، ހއ އަދި ގދ އަތޮޅުގެ އަމާންވެށީގެ ކެއަރ ވޯކަރުންނާއި ޅ، މ އަދި ތ ފެމެލީ އެންޑް ޗިލްރެންޑް ސަރވިސް ސެންޓަރުގެ ކެއަރ ވޯކަރުންނެވެ. އަދި ފިޔަވަތި، ވިލިނގިލީ އިޖުތިމާއީ ހިދުމަތްދޭ މަރުކަޒުގެ ކެއަރ ވޯކަރުކަރުން ވަނީ ބައިވެރިވެފައެވެ.