ފިއުލް ސަޕްލައި މޯލްޑިވްސް (އެފްއެސްއެމް) ގެ މެނޭޖިންގ ޑިރެކްޓަރގެ މަގާމަށް ފުރަތަމަ ފަހަރަށް އަންހެން ބޭފުޅެއް ހަމަޖައްސައިފިއެވެ.

މިއީ އެސްޓީއޯ ގްރޫޕުގެ ދަށުން ހިންގާ ކުންފުންޏެއްގެ އެމްޑީގެ މަގާމަށް ވެސް އަންހެން ބޭފުޅަކު ހަމަޖެއްސި ފުރަތަމަފަހަރު ވެސް މެއެވެ. އެފްއެސްއެމްގެ އެމްޑީގެ މަގާމަށް ހަމަޖައްސާފައިވަނީ ފާތިމަތު އާޝާން އެވެ.

އެސްޓީއޯ އިން ވިދާޅުވީ އާޝަން ވަނީ އެފްއެސްއެމްގެ އެމްޑީގެ މަގާމާ މިއަދު ހަވާލުވެވަޑައިގެންފައި ކަމަށެވެ. އަދި މަގާމާއި ހަވާލުވެވަޑައިގެންނެވި ލިޔުމުގައި ސޮއި ކުރެއްވުމަށް މިއަދު ހާއްސަ ރަސްމިއްޔާތެއް އެސްޓީއޯގައި ބާއްވާފައިވާ ކަމަށެވެ. އެ ރަސްމިއްޔާތުގައި އެސްޓީއޯގެ އެމްޑީ ޝިމާދު ގާސިމް ވެސް ބައިވެރިވެވަޑައިގެންނެވިއެވެ.

ރައީސް ޑރ. މުހައްމަދު މުއިއްޒުގެ ސަރުކާރުގައި ގިނަ ކުންފުނިތަކުގެ މެނޭޖިންގ ޑިރެކްޓަރުގެ މަގާމަށް އަންހެން ކަނބަލުން އައްޔަން ކުރައްވާނެ ކަމަށް އެމަނިކުފާނު ވަނީ މީގެކުރިން ވިދާޅުވެފައެވެ.

އެފްއެސްއެމްގެ އެމްޑީގެ މަގާމުގައި މީގެކުރިން ހުންނެވީ އިސްމާއީލް ސުހައިލްއެވެ. މިދިޔަ އަހަރުގެ ޑިސެމްބަރު މަހުގެ އެއްވަނަ ދުވަހު މަގާމާއި ހަވާލުވެލެއްވި ސުހައިލް ވަނީ މިދިޔަ ނޮވެމްބަރ މަސް ތެރޭގައި އެ މަގާމުން އިސްތިއުފާ ދެއްވާފައެވެ.