ށ. މިލަންދޫ މަގުތައް ޒަމާނީ ފެންވަރަށް ތަރައްގީ ކުރުމުގެ މަޝްރޫއުގެ މުހިންމު މަސައްކަތެއް މިހާރު ނިމިފައިވާކަމަށް އާރްޑީސީން ހާމަކުރައްވައިފިއެވެ.

އެ ކުންފުނިން ވިދާޅުވީ 2020 ވަނަ އަހަރުގެ މާރޗު 12 ގައި އެއްބަސްވުމުގައި ސޮއިކޮށް އެ އަހަރުގެ ސެޕްޓެމްބަރު މަހުގައި ޢަމަލީ މަސައްކަތް ފެށި މި މަޝްރޫއުގައި މިހާރު ކުރިއަށްދަނީ ކޮންސްޓްރަކަޝަން މިނިސްޓްރީން މި މަޝްރޫއުގެ "ފައިނަލް އިންސްޕެކްޝަން" ހެދުމުގެ މަރުހަލާ ކަމަށެވެ.

ޖުމްލަ 156،477،632.23 ދިވެހި ރުފިޔާގެ މި މަޝްރޫއުގެ ދަށުން 6.3 ކިލޯމީޓަރުގެ ދިގުމިން ހިމެނޭހެން ނުވަ މަގެއް ޒަމާނީ ފެންވަރަށް ތަރައްގީކުރުން ހިމެނެއެވެ.

އެރަށުގެ މަގުތައް ޒަމާނީ ފެންވަރަށް ތަރައްގީ ކުރަނީ ސްޓޯރމް ވޯޓަރ ނެޓްވޯކާއި ކޭބަލް ޖަންކް އަދި ސްޓޯމް ވޯޓަރ ޕަމްޕުތައް ހިމެނޭ ހެން ފެން ހިންދާ ނިޒާމާއެކުގައެވެ. އަދި ހުރިހާ މަގެއް ވެސް ތަރައްގީ ކުރެވިފައިވަނީ ތާރު އަޅައިގެންނެވެ.

ދުނިޔެއަށް ކުރިމަތިވި ކޯވިޑް-19 ގެ އާލަމީ ވަބާއާއި ގުޅިގެން މި މަޝްރޫއަށް ބޮޑެތި ލަސްތަކެއް ކުރިމަތިވިއެވެ. އަދި އެރަށުގެ މަގުތައް ޒަމާނީ ފެންވަރަށް ތަރައްގީ ކުރުމުގެ އެއްބަސްވުމުގައި ސޮއި ކުރެވުނު ދުވަހަކީ ރާއްޖޭގައި ސިއްހީ ކުއްލި ނުރައްކަލުގެ ހާލަތު އިއުލާން ކުރި ދުވަހުއެވެ.

އެހެންކަމުން އެ ކުންފުނިން ކުރިއަށް ގެންދާ މަޝްރޫއުތައް ހުއްޓާލަން މަޖުބޫރުވިއިރު، މިލަންދޫގެ މަގު ހެދުމުގެ މަޝްރޫއު ވެސް މަޑު ޖައްސާލަން ޖެހުނީ ދަތުރުފަތުރުގެ ގޮންޖެހުންތަކާއި ރަށްރަށަށް ދަތުރުކުރުން މަނާކުރުމުގެ ސަބަބުންނެވެ.

މި މަޝްރޫއަކީ ރަށުގެ އިންފްރާސްޓްރަކްޗަރ ތަރައްގީކޮށް، މަގުތަކުގެ ފެންވަރު ރަނގަޅުކުރުމަށް ކުރިއަށްގެންދާ މުހިންމު މަސައްކަތްތަކެކެވެ. މި މަސައްކަތްތައް ފުރިހަމަވުމުން، ރަށުގެ މަގުތަކުގެ ފެންވަރު ރަނގަޅުވެ، ފެންބޮޑުވުމުގެ މައްސަލަތައް ހައްލުވާނެއެވެ. އަދި ރައްޔިތުންނަށް ފަސޭހަކަމާއެކު ދަތުރުފަތުރުކުރެވޭނެ މަގު ވެސް ފަހިވެގެންދާނެއެވެ.