ކުރިއަށް އޮތް 2025 ވަނަ އަހަރަކީ ތަފާތު އަހަރަކަށް ވާނެ ކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ އަރިއަތޮޅު ދެކުނުބުރީގެ ބައެއް ރަށްތަކަށް ކުރެއްވި ދަތުރުފުޅުގެ ތެރެއިން، އެ އަތޮޅު އޮމަދޫ ރައްޔިތުންނާ ބައްދަލުކުރައްވައި، ވާހަކަފުޅުދައްކަވަމުންނެވެ.

އެރަށު ރައްޔިތުންގެ ތަރައްގީއަށްޓަކައި، ރައްޔިތުން އެދިވަޑައިގަންނަވާ ގޮތަށް ކަންކަން ކޮށްދެއްވާނެ ކަމުގެ ޔަގީންކަން ދެއްވައި، ރައީސް ވަނީ އެންމެ މުހިންމު ކަމަކަށް އޮތީ އެރަށުގެ ބަނދަރުގެ މައްސަލައަށް ހައްލު ހޯއްދަވައިދެއްވުން ކަމަށެވެ.

މީގެއިތުރުން ނިމިގެން ދިޔަ އަހަރަކީ، އެކި ސަބަބުތަކާ ހެދި މިފަދަ އެތައް ކަމަކަށް ހައްލު ހޯއްދަވައި ނުދެއްވި ދިޔަ އަހަރެއް ކަމަށާއި މައިގަނޑު ސަބަބަކީ ބަޖެޓުގެ ދަތިކަން ކަމުގައި ވިދާޅުވިއެވެ. އެހެންނަމަވެސް ކުރިއަށް އޮތް 2025 ވަނަ އަހަރަކީ ތަފާތު އަހަރަކަށް ވާނެ ކަމަށް ވަނީ ވިދާޅުވެފައެވެ.

ރައީސް ޑރ. މުޢިއްޒު ވަނީ ރަށުގެ ރައްޔިތުންގެ ކަންބޮޑުވުންތަކަށް ހައްލު ލިބިދެނިވި ފަދަ ގޮތަކަށް، ފުރިހަމަ ބަނދަރެއް ހައްދަވައިދެއްވާނެ ކަމުގެ ޔަގީންކަން ވެސް ދެއްވާފައެވެ.

ހަމަމިއާއެކު އޮމަދޫއަށް ކުރިމަތިވެފައިވާ ރަށްގިރުމުގެ މައްސަލައަށް ޢަމަލީ ސިފައެއްގައި ހައްލު ހޯއްދަވައިދެއްވާނެ ކަމަށާއި ބަނދަރާއި، ގިރާ ސަރަހައްދުގެ މަޝްރޫއުގައި ސޮއި ކުރެވިފައި އޮތް ނަމަވެސް، ޢަމަލީ މަސައްކަތެއް ކުރެވިފައި ނެތްކަން ފާހަގަކުރެއްވިއެވެ.

" 2025 ވަނަ އަހަރު، މި ދެ މަޝްރޫއުގެ ޢަމަލީ މަސައްކަތް، އަހަރުގެ ވީހާވެސް ކުރީކޮޅުގައި ފަށައިގެން ކުރިއަށް ގެންދާނަން." ރައީސް ވިދާޅުވިއެވެ.

އޮމަދޫ ރައްޔިތުންނަށް ރައީސް ވަނީ އިތުރު އުފާވެރި ޚަބަރުތައް ވެސް ދެއްވާފައެވެ. އެގޮތުން މި ފެށޭ 2025 ވަނަ އަހަރު ހިންގަން ކަނޑައަޅުއްވާފައިވާ އައު މަޝްރޫއުތަކުގެ އުސޫލުގައި އިސްކަން ދެނިވި ތަރުތީބުން، އެރަށުގެ ތައުލީމާއި ސިއްހީ ދާއިރާ އަދި ކުޅިވަރުގެ ދާއިރާއިން ވެސް ތަރައްގީގެ މަޝްރޫއުތަކެއް ކުރިއަށް ގެންދަވާނެކަމުގެ އުފާވެރި ޚަބަރު ވަނީ ދެއްވާފައެވެ.

މި މޭރުމުން ސްކޫލަށް ބޭނުންވާ މަލްޓިޕަރޕަސް ހޯލާއި، ކުލާސްރޫމްތަކާއި ސިއްހީ މަރުކަޒަށް ބޭނުންވާ އިތުރު ޖާގައާއި ވަސީލަތްތައް ވެސް އަންނައަހަރު ކޮށްދެއްވާނެ ކަމުގެ ޔަގީންކަން ދެއްވިއެވެ.