ރޯގާ ޖެހޭ ނިސްބަތް އިތުރުވަމުން އަންނަކަމަށް ތަފާސް ހިސާބުން ދައްކައިފިއެވެ.

ރާއްޖޭގައި ރޯގާގެގޮތުގައި ފެތުރެމުންދާ ބަލިތަކުގެ ތަފާސްހިސާބުތައް ހިއްސާކޮށް، ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އެންމެފަހުން ހާމަކުރައްވާފައިވާ ގޮތުގައި މިދިޔަ އޮކްޓޫބަރު މަހާއި އަޅާ ބަލާއިރު ނޮވެމްބަރ މަހު ރޯގާގެ ބަލިތައް ވަނީ އިތުރުވެފައެވެ.

އެގޮތުން ނޮވެމްބަރ މަހު އަރިދަފުސް ރޯގާ ޖެހިގެން 40،504 މީހަކު ރިޕޯޓްކޮށްފައިވާއިރު، މިއީ އޮކްޓޯބަރ މަހާ އަޅާބަލާއިރު ވަރަށްބޮޑު އިތުރުވުމެކެވެ. އޮކްޓޯބަރ މަހު ރިޕޯޓްކޮށްފައިވަނީ 29،515 ކޭސް ކަމަށް ތަފާސް ހިސާބުން ދައްކައެވެ.

މީގެއިތުރުން މިއީ ފައިބެއަހަރުގެ މިމުއްދަތުގައި އަރިދަފުސް ރޯގާ ޖެހިގެން ރިޕޯޓުކުރި އަދަދާ އަޅާބަލާއިރުވެސް އިތުރު އަދަދެކެވެ. ފައިބެއަހަރުގެ ނޮވެމްބަރ މަހު އަރިދަފުސް ރޯގާ ޖެހިގެން ރިޕޯޓްކޮށްފައިވަނީ 37،028 މީހެކެވެ.

މިއަހަރުގެ އޮކްޓޯބަރ މަހާ އަޅާބަލާއިރު، އިންފުލުއެންޒާގެ އަލާމާތްތައް ހުރެގެން ޓެސްޓް ކުރި މީހުންގެ އަދަދުވެސް ނޮވެމްބަރުމަހު އިތުރު ކަމަށާއި މިއަހަރުގެ މިހައިތަނަށް 2،375 މީހުން އިންފުލުއެންޒާއަށް ޓެސްޓް ކުރިއިރު، އޭގެ ތެރެއިން 476 ސާމްޕަލް ޕޮޒިޓިވްކަން ތަފާސްހިސާބުތަކުން ދައްކައެވެ.

މީގެތެރެއިން ނޮވެމްބަރ މަހު 164 ސާމްޕަލް ޓެސްޓުކުރިއިރު، 42 މީހަކު އިންފުލުއެންޒާއަށް ޕޮޒިޓިވްވެފައިވެއެވެ. އަދި ޑެންގީ ހުމުގެ ތަފާސްހިސާބަށް ބަލާއިރު، އޮކްޓޫބަރު މަހު 126 ކޭސް ރިޕޯޓުކޮށްފައިވެވެ. ނޮވެމްބަރ މަހުގެ ރިޕޯޓްކޮށްފައިވަނީ 140 ކޭސްއެވެ.

ބޭރަށް ހިންގާ ރޯގާއެއް ވެސް މިދުވަސްވަރު ފެތުރެމުންދާއިރު، ބޭރަށް ހިންގުން ޖެހިގެން މިދިޔަ އޮކްޓޯބަރ މަހު 3،164 ކޭސް އަދި ނޮވެމްބަރ މަހު3،635 ކޭސް ރިޕޯޓުކޮށްފައިވެއެވެ.

އާންމު ބަލިތައް ފެތުރޭ އަދަދު މިދުވަސްވަރު އިތުރުވަމުންދާތީ އެޗްޕީއޭ އިން ވަނީ ބަލިތަކުން ރައްކާތެރިވުމަށް ފިޔަވަޅުތައް އެޅުމަށް އިލްތިމާސް ކުރައްވާފައެވެ.