ހއ. ތުރާކުނު މިސްކިތުގައި ވުޟޫކުރާ ސަރަހައްދުގެ ކޮންކްރީޓް މަސައްކަތް ނިމިއްޖެއެވެ.

އެމްޓީސީސީން ހާމަކުރައްވާފައިވާ ގޮތުގައި އެ މިސްކިތް ބިނާކުރުމުގެ މަޝްރޫއުގެ ދަށުން ފިރިހެނުންނާއި އަންހެނުންނަށް ވުޟޫކުރުމަށް ހާއްސަ ދެ ސަރަހައްދެއް ގެންދަނީ ހަދަމުންނެވެ. އަދި އެ ދެ ސަރަހައްދުގެ ކޮންކްރީޓް މަސައްކަތް މިހާރު ވަނީ ނިމިފައެވެ.

ސައިޓުގައި މިހާރު ކުރިއަށްދަނީ މިސްކިތުގެ ޝީޓު އެޅުމުގެ މަސައްކަތް ކަމަށާއި މި ތަނުގައި މި ވަގުތު ސްލެބްގެ ޝަޓަރިންގ އަދި ބާބެންޑިންގ ގެ މަސައްކަތް ވެސް ކުރިއަށްދާކަމަށް އެ ކުންފުނިން ވިދާޅުވެއެވެ.

މި މިސްކިތަކީ 300 މީހުންގެ ޖާގައިގެ މިސްކިތެކެވެ. މި މަޝްރޫއު އެމްޓީސީސީއާއި ހަވާލުކޮށްފައިވަނީ 11.21 މިލިޔަން ރުފިޔާއަށް 365 ދުވަސް ތެރޭގައި ނިންމާގޮތަށެވެ.

ތުރާކުނު ކައުންސިލުން ވިދާޅުވެފައިވަނީ އާބާދީގައި ގާތްގަޑަކަށް 700 މީހުން އޮންނަ ތުރާކުނުގައި ޒަމާނީ ފެންވަރެއްގެ މިސްކިތެއް އެޅުމަކީ މީގެ 15 އަހަރު ކުރިން ފެށިގެން ރައްޔިތުން ދެކެމުން އަންނަ ހުވަފެނެއް ކަމަށެވެ. އަދި 2022 ވަނަ އަހަރު މިސްކިތުގެ ޢަމަލީ މަސައްކަތް ފެށި ނަމަވެސް އެދެވޭ ގޮތެއްގައި މަސައްކަތް ކުރިއަށްގޮސްފައިނުވާކަން ވެސް ވަނީ ފާހަގަކުރައްވާފައެވެ.