ގްރީނިންގ އެޑިޔުކޭޝަން އާއި ދެމެހެއްޓެނިވި ތަރައްގީގެ ލަނޑުދަނޑިތައް ހާސިލުކުރުމަށް ހުރިހާ ކުދިން ޝާމިލުކޮށްގެން ކިޔަވައިދިނުމާ ގުޅޭ މުހިންމު ވޯކްޝޮޕެއް ކުރިއަށް ގެންގޮސްފިއެވެ.

ނޭޝަނަލް އިންސްޓިޓިއުޓް އޮފް އެޑިޔުކޭޝަނާއި އިސްލާމިކް ވޯލްޑް އެޑިޔުކޭޝަނަލް، ސައިންޓިފިކް އެންޑް ކަލްޗަރަލް އޯގަނައިޒޭޝަން (އައިސެސްކޯ) ގުޅިގެން އިމާދުއްދީން ސްކޫލުގައި ކުރިއަށްގެދިޔަ މި ވޯކްޝޮޕްގައި ސްކޫލުތަކުގެ އިސްވެރީންނާއި މިނިސްޓްރީގެ އިސް މުވައްޒަފުން ބައިވެރިވެ ވަޑައިގެންނެވިއެވެ.

އައިސެސްކޯގެ މެންބަރު ގައުމެއްގެ ހައިސިއްޔަތުން ރާއްޖެއިން ދަނީ އައިސެސްކޯގެ ގްރީން އެޑިޔުކޭޝަން ފްރޭމްވޯކްގައި ޔުނެސްކޯގެ ލަނޑުދަނޑިތަކާ އެއްގޮތަށް، ތައުލީމީ ނިޒާމުގެ ތެރެއަށް ދެމެހެއްޓެނިވި އާދަތައް އެކުލަވާލުމަށް ބައިނަލްއަގްވާމީ ފެންވަރުގައި ކުރެވޭ މަސައްކަތްތަކުގައި އަމަލީގޮތުން ބައިވެރިވަމުންނެވެ.

މިގޮތުން އުނގަންނައިދިނުމުގައި ތިމާވެށްޓާ ރައްޓެހި އުސޫލުތައް ކުރިއެރުވުމާއި، ސްކޫލު މާހައުލުގައި ހަރަކާތްތެރިވާ ފަރާތްތައް އަދި މުޅި މުޖުތަމައުއަށް ތިމާވެށްޓާ ގުޅުންހުރި މައުލޫމާތު ފޯރުކޮށްދީ، ތިމާވެށި ރައްކާތެރިކުރުމާމެދު ޒިންމާދާރުކުރުވުން ހިމެނެއެވެ. އަދި ސްކޫލުގައި ކިޔަވައިދޭ މާއްދާތައް ވަނީ ތިމާވެށީގެ ޚާއްޞަ މަފްހޫމުތަކާއި މަޢުލޫމާތުތައް ހިމެނޭނެ ގޮތަށް ބައްޓަންކުރެވިފައިވެއެވެ.

މި ވޯކްޝޮޕް ފެސިލިޓޭޓް ކޮށްދެއްވީ އައިސެސްކޯގެ އެޑިޔުކޭޝަން ސެކްޓަރ ހެޑް ޑރ. ހަދީ ޖަތައު ސޭ އަދި އައިސެސްކޯގެ އެޑިޔުކޭޝަން އެކްސްޕާޓް ވަގަސް ނާސިރު އަފްރިދީ އެވެ.

މި ވޯކްޝޮޕްގައި ދެމެހެއްޓެނިވި ލަނޑުދަނޑި 4 ހާސިލުކުރުމުގައި ގްރީން އެޑިޔުކޭޝަންގެ މުހިންމުކަމާއި، ސްކޫލުގައި ހިންގޭ އުނގެނުމާއި އުނގަންނައިދިނުމުގެ ހަރަކާތްތަކުގެ ތެރެއިން ދަރިވަރުން ތިމާވެއްޓަށް ހިތްޖައްސުވައި، ލޯބި އުފެއްދުމުގެ އިތުރުން ދަރިވަރުންނާއި ބެލެނިވެރީން ޒިންމާދާރުކުރުވޭނެ ގޮތްތަކާ ގުޅޭގޮތުން މަޝްވަރާކުރެވި، ހިޔާލު ބަދަލުކުރެވުނެވެ.

މީގެއިތުރުން ސްކޫލުތަކުގައި ފެހި މަދަރުސާގެ ދަށުން ޕްރޮގްރާމްތައް ކުރިއަށްގެންދިއުމުގައި ހުރި ގޮންޖެހުންތަކާ ގުޅޭގޮތުން ވެސް މަޝްވަރާކުރެވުނެވެ.