ސީރިއާގެ މިނިވަންކަމާއި، ސިޔާދަތާއި، ސަރަހައްދީ ސަލާމަތަށް ތާއީދުކުރުމުގައި ރާއްޖެ ދެމިއޮންނާނެކަމުގައި ރާއްޖޭގެ ފޮރިން މިނިސްޓްރީން ވިދާޅުވެއްޖެއެވެ.

އެ މިނިސްޓްރީން މިފަދައިން ވިދާޅުވީ ސީރިޔާގެ ގޯލަން ހައިޓްސްގައި އިސްރާއީލުން ވަޒަންވެރިވުމަށް ކުރަމުންގެންދާ މަސައްކަތްތަށް ކުށްވެރިކޮށް ދިވެހި ސަރުކާރުން ނެރުނު ސްޓޭޓްމަންޓުގައެވެ.

އެ ސްޓޭޓްމެންޓުގައި ވަނީ ސީރިޔާގެ ރައްޔިތުންގެ އުންމީދުތައް ހާސިލްވާނެ ގޮތަށް، އެ ގައުމުގައި ސުލްހައާއި، ސަލާމަތާއި، އިސްތިގްލާލު ގާއިމްކުރުމަށް ކުރެވޭ ސަރަހައްދީ އަދި ބައިނަލްއަގްވާމީ ހުރިހާ މަސައްކަތަކަށް ރާއްޖެއިން ފުރިހަމަ އެއްބާރުލުން ދޭނެ ކަމުގެ ޔަގީންކަން ދޭ ކަމަށެވެ.

މީގެއިތުރުން ވަނީ ސީރިޔާގެ ގޯލާން ހައިޓްސްގެ ބިންތަކުގައި އިސްރާއީލުން ވަޒަންވެރިވުމަށް ކުރަމުންގެންދާ މަސައްކަތްތަށް ފުޅާކުރުމަށް އިސްރާއީލުގެ ސަރުކާރުން ނިންމާފައިވާ ނިންމުން ދިވެހި ސަރުކާރުން ހަރުކަށި އިބާރާތުން ކުށްވެރިކުރައްވާފައެވެ.

"މި ނިންމުމަކީ ބައިނަލްއަގްވާމީ އެންމެހައި ގާނޫނުތަކާ ކަނޑައެޅިގެން ޚިލާފު އަދި މި ސަރަހައްދުގައި ސުލްހަ ގާއިމުކުރުމަށް ކުރަމުންދާ މަސައްކަތްތަކަށް އިތުރު ގޮންޖެހުންތަކެއް ކުރިމަތި ކުރުވާ ނިންމުމެއް ކަމުގައި ދިވެހި ސަރުކާރުން ގަބޫލުކުރަމެވެ." ސްޓޭޓްމެންޓުގައި ވެއެވެ.

ފޮރިން މިނިސްޓްރީން އިތުރަށް ވަނީ ބައިނަލްއަގްވާމީ ގާނޫނާ ހިލާފަށް ސީރިޔާގެ ގޯލާން ހައިޓްސް ގެ ބިންތަކަށް ނުހައްގުން ވެރިވެގަތުމަށް އިސްރާއީލުން ހިންގަމުންގެންދާ ޖަރީމާތައް ހުއްޓުވުމަށް ވެސް ގޮވާލާފައެވެ. އަދި އިސްރާއީލުން ސީރިޔާއަށް ދެމުންގެންދާ އުދުވާނީ ހަމަލާތަށް ނިމުމަކަށް ގެނައުމަށް ވެސް ގޮވާލާފައެވެ.

ހަމަމިއާއެކު އދ. ގެ ކަމާބެހޭ ގަރާރުތަކަށް ހުރުމަތްތެރިކޮށް ހިތުމަށް އިސްރާއީލަށް މަޖުބޫރުކުރުވުމަށް އަޅަންޖެހޭ އަވަސް ފިޔަވަޅުތައް އެޅުމަށް ބައިނަލްއަގްވާމީ މުޖުތަމައަށް ދިވެހި ސަރުކާރުން ގޮވާލާފައި ވެއެވެ. އަދި 1967 ވަނަ އަހަރުން ފެށިގެން ސީރިޔާގެ ގޯލާން ހިފާފައިވާކަން ފާހަގަކުރައްވައި، ސަލާމަތީ މަޖިލީހުގެ ޤަރާރު 497 (1981) ފަދަ އދ. ގެ ކަމާގުޅޭ ގަރާރުތަކަށް ޢަމަލުކުރުމަށް އިސްރާއީލަށް އިލްތިމާސްކުރައްވާފައި ވެއެވެ.