އެންމެހާ ދިވެހިން ކޮއްޕަމުން، ލަވަމުން، ވައްދަމުން އެގެންދަނީ ނުތަނަވަސްކަމާއި ކަންބޮޑުވުމެއްގެ ތެރެއަށް ކަމުގައި އެމްޑީޕީގެ ރައީސް ޢަބްދުﷲ ޝާހިދު ވިދާޅުވެއްޖެއެވެ.

'އެކްސް' ގައި ކުރައްވާފައިވާ ޕޯސްޓެއްގައި ޝާހިދު ވިދާޅުވީ އަހަރު ނިމިގެން ދާއިރު، މި ސަރުކާރުގެ މާލީ ހިސާބުތަކުން ދިވެހިންގެ ހިތްތަކަށް ލިބޭ ފިނިކަމެއް، ލިބުނު ހިތްހަމަޖެހުމެއް ނުފެނުނު ކަމަށެވެ.

"އަޅުވެތިކަމުގެ ބަނދެލުމަކުން ދިވެހިން ބަނދެލުމަށް މި ސަރުކާރުން އެވަނީ މިސްރާބު ހިފާފައި." ޝާހިދު ވިދާޅުވިއެވެ.

މީގެއިތުރުން މިދިޔަ އަހަރާ ބަލާއިރު، ދައުލަތަށް ލިބުނު އާމްދަނީ 78 މިލިޔަން އިތުރުވެފައި ވީނަމަވެސް ރައްޔިތުން ބިކަވެ, ނިކަމެތިވެފައިވާ ކަމަށް ޝާހިދުގެ ޕޯސްޓުގައި ވެއެވެ. އަދި ސަރުކާރުން އާސަންދައަށް ކުރި ޚަރަދު 101 މިލިއަން ރުފިޔާ މަދުކޮށްފައިވާކަމަށް ވެސް ވިދާޅުވިއެވެ.

ރާއްޖޭގެ ފޮރިން މިނިސްޓަރުކަން ވެސް ކުރައްވާފައިވާ ޝާހިދު އިތުރަށް ވިދާޅުވީ އިވެމުން ދަނީ ނިކަމެތި ރައްޔިތު މީހާ، އާސަންދައަށް އެދި ރޮއެ ކުރާ އާދޭހުގެ ހިތްދަތި އަޑު ކަމަށެވެ. އެހެންނަމަވެސް ސިޔާސީ މުސާރަ އާއި ގުޅުންހުރި ޚަރަދުތަކަށް1.4 ބިލިއަން ރުފިޔާ އިތުރަށް ޚަރަދުކޮށްފައިވާ ކަމަށެވެ.

ޝާހިދުގެ ޕޯސްޓު ނިންމާލައްވަމުން ވިދާޅުވެފައިވަނީ އާންމު ރައްޔިތުންގެ ވޭނުގެ އަޑު އެހުމާއި ނުލައި ކުރިއަށްދަނީ ސަރުކާރުގެ އިސްވެރިންގެ ޒާތީ މަންފާއަށް ކުރާ ބޭކާރު ހޭދަތަކާއި އެމަގަށް ކުރާ މަސައްކަތްތައް ކަމަށެވެ.