އެޗް.އައި.ވީ. ވައިރަލް ހެޕަޓައިޓިސް އަދި ސެކްޝުއަލީ ޓްރާންސްމިޓެޑް އިންފެކްޝަންސްގެ ނޭޝަނަލް ގައިޑްލައިންތައް އިފްތިތާހުކޮށްފިއެވެ.

މި ގައިޑްލައިންތައް އިފްތިތާހުކޮށްދެއްވީ ބައިނަލްއަގްވާމީ އެއިޑްސް ދުވަސް ފާހަގަކުރުމަށް މީރުމާ މާލަމުގައި ބޭއްވި ރަސްމިއްޔާތެއްގައި ރައީސް ޑރ. މުޙައްމަދު މުޢިއްޒުގެ އަނބިކަނބަލުން މެޑަމް ސާޖިދާ މުޙައްމަދުއެވެ.

މި ގައިޑްލައިންތައް އިފްތިތާހުކޮށްދެއްވުމަށްފަހު، އެ ގައިޑްލައިންތަކުގެ މައްޗަށް ޕެނަލް ޑިސްކަޝަނެއް ކުރިއަށްގެންގޮސްފައިވެއެވެ. މި ޕެނަލް ޑިސްކަޝަންގައި، ރާއްޖޭގައި މި ބަލިތައް ފެތުރުމާއި ބަލިތައް ދެނެގަތުމާއި އަވަސް ފަރުވާ ދިނުމާ ގުޅޭ ގޮތުން ވަރަށް ފުޅާ ދާއިރާއެއްގައި މަޝްވަރާކުރައްވާފައިވެއެވެ.

އެޗް.އައި.ވީ. އަށް ފަރުވާ ދިނުމާ ގުޅޭ ގައިޑްލައިން އަލުން އެކުލަވާލެވިފައިމިވަނީ ނުވަ އަހަރުގެ މެދުކެނޑުމަކަށްފަހުގައެވެ.

އެޗް.އައި.ވީ.، ވައިރަލް ހެޕަޓައިޓިސް އަދި ސެކްޝުއަލީ ޓްރާންސްމިޓެޑް އިންފެކްޝަންސްއާ ގުޅޭ ގައިޑްލައިންތައް އެކުއެކީގައި މުތާލިއާ ކުރެވި، އެކުލަވާލެވި، އަދާހަމަކުރެވި، ތަންފީޒުކުރެވެން ފެށިގެން ދިއުމަކީ މިދާއިރާއިން ރާއްޖެއަށް ލިބިގެންދާ ވަރަށް ބޮޑު ކުރިއެރުމެކެވެ.

މި އިފްތިތާހުކުރެވުނު މި ގައިޑްލައިންތަކަކީ ދުނިޔޭގެ ސިއްހަތު ޖަމިއްޔާގެ އެންމެ ފަހުގެ އިރުޝާދާއި ލަފާގެ މައްޗަށް އެކުލަވާލާފައިވާ ގައިޑްލައިންތަކެކެވެ.