މަތީ ތައުލީމު ހާސިލުކުރާ ކޮންމެ ދަރިވަރަކީ އެދަރިވަރެއްގެ ކުޅަދާނަކަމާއި ގާބިލްކަމާއި މެދު ޝައްކު ނުއުފެދޭ ފަދަ ދަރިވަރަކަށްވުމަށް ހަޔަރ އެޑިއުކޭޝަން މިނިސްޓަރ ޑރ. މަރްޔަމް މާރިޔާ އިލްތިމާސްކުރައްވައިފިއެވެ.

ވިލާ ކޮލެޖްގެ ހިތަދޫ ކެމްޕަސް އިފްތިތާހްކުރުމަށް ބޭއްވި ރަސްމިއްޔާތުގައި މިނިސްޓަރ ވިދާޅުވީ ވިލާ ކޮލެޖަކީ އައްޑޫ ސިޓީއަށް އެތަށް ހިދުމަތްތަކެއް ފޯރުކޮއްދެއްވާފައިވާ ކޮލެޖެއް ކަމަށެވެ. އަދި މިއަދު ހުޅުވިގެންދާ ހިތަދޫ ކެމްޕަހަކީ އެންމެ ޒަމާނީ ވަސީލަތްތަކާއިއެކު ހުޅުވިގެންދާ ކެމްޕަހެއް ކަމަށެވެ.

މިނިސްޓަރު ވަނީ ވަޒީފާއަކަށް ދިޔަނަމަ، ވަޒީފާ ދިންފަރާތް މާޔޫސްނުވާފަދަ ހުނަރުހުރި ދަރިވަރަކަށް ކޮންމެ ދަރިވަރަކުވެސް ވުން ބޭނުންތެރި ކަމުގައި ވެސް ވިދާޅުވެފައެވެ. އަދި ވަޒީފާއެއް އަދާކުރަން ބޭނުން ނެތް ނަމަ އަމިއްލަ މަސައްކަތަކުން ދިރިއުޅުން އާރާސްތު ކުރެވޭފަދަ ހުނަރުވެރި ދަރިވަރަކަށްވުމަކީ އަޒުމް ކަމުގައި ކޮންމެ ދަރިވަރަކު ވެސް ހަދަންވާނެ ކަމަށް ވެސް ވިދާޅުވިއެވެ.

ޑރ. މަރްޔަމް މާރިޔާ ވަނީ މަތީ ތައުލީމުގެ ދާއިރާގެ ކުރިއެރުމަށް މަސައްކަތްކުރާ ފަރާތްތަކުގެ އެންމެ ކުރީ ސަފުން ވިލާ ކޮލެޖް ޖާގަ ހޯއްދަވާފައިވާކަމާއި، ކޮލެޖުގެ އިތުރުން ވެސް އެހެނިހެން އަމިއްލަ ފަރާތްތަކުން މަތީ ތައުލީމު ކުރިއެރުވުމަށް އެތަށް އަގުހުރި މަސައްކަތްތަކެއް ކުރައްވަމުންދާކަން ފާހަގަކުރައްވައި، ޝުކުރު އަދާކުރައްވާފައެވެ.

މި ރަސްމިއްޔާތުގައި އައްޑޫ ސިޓީގެ މޭޔަރ ޢަލީ ނިޒާރު، ވިލާ ކޮލެޖްގެ ރެކްޓަރ ޑރ. އަޙްމަދު އަންވަރު އަދި އެހެނިހެން އިސްބޭފުޅުން ވަނީ ބައިވެރިވެވަޑައިގަންނަވާފައެވެ.