މޯލްޑިވްސް މީޑިއާ ކައުންސިލް (އެމްއެމްސީ) ގެ 8 ވަނަ ދައުރުގެ ރައީސްގެ މަގާމަށް ޙުސައިން ޘަގީފް އަދި ނައިބު ރައީސްގެ މަގާމަށް އިބްރާހިމް މުޙައްމަދު އިންތިހާބުކޮށްފިއެވެ.

މި ދެ މަގާމަށް ބޭފުޅަކު އައްޔަން ކުރުމަށް ޑިސެމްބަރ 15 ވީ އާދީއްތަ ދުވަހު ބޭއްވި 8 ވަނަ ދައުރުގެ ފުރތަމަ ބައްދަލުވުމުގައި އިންތިހާބު ކުރެވިފައިވަނީ ނައިބު ރައީސްގެ މަގާމު އެކަންޏެވެ. އެއީ ރައީސްގެ މަގާމަށް ވާދަކުރެއްވި ތިލަދުން އޮންލައިންގެ ޙުސައިން ޘަގީފް އާއި މިހާރު އޮންލައިންގެ ފާތިމަތު ސަނާ ގެ ވޯޓު އެއްވަރުވުމުންނެވެ.

އެހެންކަމުން ރައީސްގެ މަގާމަށް ބޭފުޅަކު އިންތިހާބުކުރުމަށް ޑިސެމްބަރ 16 ވީ ހޯމަ ދުވަހު ހަވީރު ބޭއްވި ޖަލްސާގައި ޘގީފް ވަނީ ކުރި ހޯއްދަވާފައެވެ.

ނައިބު ރައީސްގެ މަގާމު އިބްރާހިމް މުޙައްމަދު ކާމިޔާބުކުރެއްވީ އިބްރާހިމް ފައުޒީ އާ ވާދަކުރައްވައިގެންނެވެ.

މޯލްޑިވްސް މީޑިއާ ކައުންސިލުގެ 7 ވަނަ ދައުރުގެ 10 މެމްބަރެއްގެ ދައުރު މި ހިނގާ ޑިސެމްބަރ މަހުގެ 14 ވަނަ ދުވަހަށް ހަމަވާތީ، އައު މެމްބަރުން އިންތިހާބުކޮށްފައިވަނީ ޑިސެމްބަރ 7 ވަނަ ދުވަހުއެވެ.

އެ އިންތިހާބުގައި 139 މީޑިއާއަކުން ވޯޓުލާފައިވާއިރު، 22 ކެންޑިޑޭޓުން ވަނީ ވާދަކޮށްފައެވެ.

މި އިންތިހާބުގައި މީޑިއާ ތަމްސީލުކުރާ ފަރާތްތަކުގެ ތެރެއިން އެމްއެމްސީގެ މެމްބަރުކަމަށް އިންތިހާބުވީ މިހާރު އޮންލައިންގެ ފާތިމަތު ޝަނާ (118 ވޯޓު) އާއި ވަގުތު އޮންލައިންގެ ނަޖާހް މަސްއޫދު (117 ވޯޓު) އާއި އާފަތިސްގެ ފަރާތުން ހަސަން ޝާކިރު (93 ވޯޓު) އާއި ހަފްސީ ޑޮޓްކޮމްގެ ހަފްސީ އަބްދުﷲ (75 ވޯޓު) އެވެ.

މީގެއިތުރުން ހަތާވީސް އޮންލައިންގެ ހުސެއިން ހަސަން ( 74 ވޯޓު) އާއި އެމްއެމްސީ 6 ވަނަ ދައުރުގެ ނައުިބު ރައީސް ތިލަދުން އޮންލައިންގެ ހުސެއިން ޘަގީފް (74 ވޯޓު) އަދި ދިޔަރެސްގެ ނަހުދާ ފާއިޒް (71 ވޯޓު) އެވެ.

މި އިންތިހާބުގައި އަމިއްލަގޮތުން ވާދަކުރި ފަރާތްތަކުގެ ތެރެއިން އިންތިހާބުވީ އެމްއެމްސީގެ ކުރީގެ ލީގަލް ހެޑް ފާތިމަތު ފަހުމީ (76 ވޯޓް) އާއި ނޫސްވެރިއެއްގެ ގޮތުގައި ކުރިން ހަރަކާތްތެރިވެފައިވާ އިބްރާހިމް މުހައްމަދު (49 ވޯޓް) އަދި އެމްއެމްސީގެ 6 ވަނަ ދައުރުގެ ވެސް މެމްބަރެއް ކަމުގައިވާ ގާނޫނީ ވަކީލު އިބްރާހިމް ފައުޒީ (80 ވޯޓު) އެވެ.

އެމްއެމްސީގެ ކައުންސިލު އެކުލެވިގެންވަނީ މީޑިއާގެ އިދާރާތައް ތަމްސީލުކުރާ 8 މެންބަރުންނާއި އާންމުންގެ ތެރެއިން އިންތިހާބު ކުރެވޭ 7 މެންބަރުންނާއެކު ޖުމްލަ 15 މެންބަރުންގެ މައްޗަށެވެ. މިއީ ދެ އަހަރުގެ ދައުރަކަށްވާއިރު، އެއްވެސް މެމްބަރަކަށް ޖެހިޖެހިގެން ދެ ދައުރުގައި ނުހުރެވޭނެއެވެ.

ދައުރުގެ މެދުތެރެއިން މެމްބަރަކު ވަކިކޮށް ނުވަތަ އިސްތިއުފާދީފިނަމަ، އަލަށް އިންތިހާބުވާ މެމްބަރުންގެ ދެ އަހަރު ގުނާނީ އިންތިހާބުކުރާ ދުވަހުން ފެށިގެންނެވެ.

އެމްއެމްސީގެ 8 ވަނަ ދައުރުގެ ރައީސް އާއި ނައިބު ރައީސް އަދި އަލަށް އިންތިހާބުވި މެމްބަރުންނަށް 'އޮއިވަރު' ކިޔުންތެރިންނާއި މުވައްޒަފުން އަދި މެނޭޖުމެންޓުގެ ނަމުގައި ހޫނު މަރުހަބާއެއް ދަންނަވަމެވެ.