މޯލްޑިވްސް އިސްލާމިކް ބޭންކް (އެމްއައިބީ) ގެ ހިދުމަތް ފުޅާކޮށް،ޅ. ނައިފަރުގައި ސަރވިސް ސެންޓަރެއް ހުޅުވައިފިއެވެ.

މި ސަރވިސް ސެންޓަރު ހުޅުވާފައިވަނީ އެކަމަށްޓަކައި ބޭއްވި ހާއްސަ ރަސްމިއްޔާތެއްގައި އެ ބޭންކުގެ ސީއީއޯ އަދި މެނޭޖިންގ ޑިރެކްޓަރު މުފައްދަލް އިދްރީސް ހުމްރީއާއި ނައިފަރު ކައުންސިލުގެ ރައީސް މުހައްމަދު ރަޝީދެވެ.

އެމްއައިބީން ހާމަކުރައްވާފައިވާ ގޮތުގައި މި ސެންޓަރު މެދުވެރިކޮށް އެ ބޭންކުން ފޯރުކޮށްދޭ ހުރިހާ ހިދުމަތްތަކާއި އެ ސެންޓަރުގައި ބަހައްޓާފައިވާ އޭޓީއެމުން 24 ގަޑިއިރު ހިދުމަތް ލިބޭނެއެވެ.

އެ ބޭންކުގެ ހިދުމަތް ރާއްޖޭގެ ހުރިހައި ކަންކޮޅުގައި ދިނުމަށް ކުރައްވަމުން ގެންދަވާ މަސައްކަތރުގެ ދަށުން މިހާރުވެސް ވަނީ އިތުރު ރަށްރަށުގައި ސަރވިސް ސެންޓަރުގެ ހިދުމަތް ދެމުންނެވެ.

އެގޮތުން ހއ، ހދ. ބ، ކ، ދ، ލ، ގއ، ގދ، ފުވައްމުލައް އަދި އައްޑޫ ސިޓީގައި ވެސް ސަރވިސް ސެންޓަރުތަކުގެ ހިދުމަތް އަންނަނީ ފޯރުކޮށްދެމުންނެވެ. އަދި މުޅި ރާއްޖެއަށް އެ ބޭންކުގެ ހިދުމަތް ފުޅާ ކުރުމަށް ވެސް ގިނަ މަސައްކަތްތަކެއް އަންނަނީ ކުރަމުންނެވެ.