ހިނގުމުގައި ނުކުޅެދުންތެރިކަން ހުންނަ ކުއްޖަކަށް ހެޔޮއެދޭ ފަރާތަކުން ވީލްޗެއަރ އެއް ހަދިޔާކޮށްފިއެވެ.

އެ ފަރާތުގެ އެދުމުގެ މަތީން މި ވީލްޗެއަރ އެކުއްޖާ އާ ހަވާލުކޮށްފައިވަނީ ވާސޯ މެޑިކަލް ސެންޓަރ (ވީ.އެމް.ސީ) އާއި ވީލްޗެއަރ އެސޯސިއޭޝަން އޮފް މޯލްޑިވްސް (ޑަބްލިއު.އޭ.އެމް) ގެ ފަރާތުންނެވެ.

'އޮއިވަރު' އަށް މައުލޫމާތު ދެއްވަމުން ވީއެމްސީން ވިދާޅުވީ އަމިއްލަ ހާލަތަށް ހިނގާ އުޅުމުން މަހްރޫމުވެފައިވާ ދާއިމީ ނުކުޅެދުންތެރިކަން ހުންނަ މި ކުއްޖާ އަށް ވީލްޗެއަރ ހަވާލުކޮށްދިނީ ޢަބްދުލް ބާއިސް ޢަލީ ކަމަށެވެ.

ވީ.އެމް.ސީ އާއި ޑަބްލިއު.އޭ.އެމް އިން ގެންދަނީ އެންމެ ބޭނުންޖެހިފައިވާ މިފަދަ ފަރާތްތަކަށް މެނުއަލް އަދި މޮޓޯ ރިމޯޓު ވީލްޗެއަރ ހޯދައިދިނުމަށް ވަރަށްބޮޑަށް މަސައްކަތް ކުރަމުންނެވެ. އަދި މިފަދަ އެހީ ދިނުމަށް ބޭނުންވާ ފަރާތްތަކުން ދޭ އެހީތައް އަމާނާތްތެރިކަމާއެކު ދަނީ ފޯރުކޮށްދެމުންނެވެ.

މީގެއިތުރުން ވެސް ހާއްސައެހީއަށް ބޭނުންވާ ފަރާތްތަކަށް ބޭނުންވާ އެހެނިހެން ކަންކަމަށް މަގުފަހިކޮށްދީ، އެ އިންތިޒާމުތައް ވެސް ދަނީ ހަމަޖައްސައިދެމުންނެވެ.