ކަނޑަށް ވެއްޓުނު ބިދޭސިއެއް ހޯދުމުގެ މަސައްކަތް ފަށައިފިއެވެ.

ދިވެހި ފުލުހުންގެ ހިދުމަތުން ވިދާޅުވީ އައްޑޫ ސިޓީން މާލެއަށް ދަތުރުކުރަމުންދިޔަ ބޯޓަކުން ބިދޭސީއަކު ގެއްލިގެން ހޯދަމުން އަންނަކަމަށެވެ. އަދި އެއީ "ސީމެކްސް" ނަމަކަށް ކިޔާ ބޯޓެއް ކަަމަށެވެ.

ގެއްލިގެން ހޯދަމުންދަނީ އެ ބޯޓުގައި ފަޅުވެރިއެއްގެ ގޮތުގައި މަސައްކަތް ކުރަމުން އަންނަ ނޭޕާލުގެ ރައްޔިތެއް ކަމަށްވާ ރާޖު ކުމާރު ކަމަށް ވެސް ވިދާޅުވިއެވެ. ބޯޓު އައްޑު އިން ފުރީ ރޭ 11:30 ގައި ކަމަށާއި އޭރު އޭނާ (ރާޖު ކުމާރު) ބޯޓުގައި ހުރި ކަަމަށް ފުލުހުންނަށް މައުލޫމާތު ލިބިފައިވާ ކަމަށް ވަނީ ހާމަކުރައްވާފައެވެ.

މީގެއިތުރުން ރޭ ދަންވަރު 1:15 ގައި ބޯޓުގެ ކެޕްޓަނާ ވާހަކަ ދެއްކި ކަމަށް ވެސް މިހައިތަނަށް ބެލި ބެލުމުން އެންގޭ ކަމަށް ފުލުހުން ވިދާޅުވެއެވެ.

ފުލުހުން އިތުރަށް ވިދާޅުވީ ރާޖު ކުމާރު ބޯޓުގައި ނެތްކަން އެނގިފައިވަނީ އައްޑޫ ސިޓީއާއި ފުވައްމުލައް ސިޓީއާ ދެމެދު ކަނޑުމަތިން، ފުވައްމުލަކާ 8 މޭލަށް ކައިރިވެފައިވަނިކޮށްކަމަށް މައުލޫމާތު ލިބިފައިވާ ކަމަށެވެ.

އޭނާ ހޯދުމުގެ މަސައްކަތް މިހާރު އެމްއެންޑީއެފުން ކުރަމުން އަންނަކަމަށާއި މިކަން ފުލުހުން ވެސް ގެންދަނީ ތަހުގީގު ކުރަމުން ކަމަށް ވަނީ ވިދާޅުވެފައެވެ.