ކޮޅުމަޑުލު މަޑިފުށި މީހަކު ގެއްލިގެން ހޯދަން ފަށައިފިއެވެ.

ދިވެހި ފުލުހުންގެ ހިދުމަތުން ވިދާޅުވީ ގެއްލިގެން ހޯދަމުން ދަނީ ތ. މަޑިފުށި / ބޮންތި، ޙަސަން ނިހާލު ކަމަށެވެ. އަދި އޭނާ އަކީ އުމުރުން 34 އަހަރުގެ މީހެއް ކަމަށެވެ.

އާއިލާއަށް ޚަބަރެއްނުވެ ގެއްލިފައިވާ ކަމަށް ޑިސެންބަރު 15 ވަނަ ދުވަހުގެ ރޭ 8:07 ގައި ރިޕޯޓުކުރުމާއި ގުޅިގެން އޭނާ ހޯދުމުގެ މަސައްކަތް ފުލުހުން ކުރަމުން އަންނަކަމަށް ވެސް ވިދާޅުވެފައި ވެއެވެ. އެހެންނަަމވެސް އެންމެފަހުން އޭނާ އާ ދިމާވިތަނެއް ނުވަތަ ލައިގެން ހުރި އަންނައުނުގެ މައުލޫމާތެއް ހިއްސާއެއް ނުކުރައްވައެވެ.

އެ އިދާރާ އިން ވަނީ ޙަސަން ނިހާލުގެ އެއްވެސް މައުލޫމާތެއް ލިބިފައިވާ ފަރާތެއް ވާނަމަ ފުލުހުންގެ ހޮޓްލައިން ނަންބަރު 3322111 އަށް ނުވަތަ ތ. މަޑިފުށި ޕޮލިސް ސްޓޭޝަންގެ ނަންބަރު 9868475 އަށް ގުޅުއްވައި ހިއްސާކުރުމަށް އެދިފައެވެ.