މި ހިނގާ ޑިސެމްބަރ މަހުގެ 12 ވަނަ ދުވަހު ހައުސިންގ މިނިސްޓްރީ ހުރި އިމާރާތުގައި ހިނގި އަލިފާނުގެ ހާދިސާ އާ ގުޅޭ މައުލޫމާތު ހިއްސާކުރުމަށް ދިވެހި ފުލުހުންގެ ހިދުމަތުން އެދިލައްވައިފިއެވެ.

އެ އިދާރާ އިން ވިދާޅުވީ އެ ހާދިސާގެ ތަހުގީގަށް ބޭނުންވާނެ ނުވަތަ ބޭނުން ކުރެވިދާނެ އެއްވެސް މައުލޫމާތެއް ލިބިފައިވާނަމަ އެކަން މޭޖަރ ކްރައިމް އިންވެސްޓިގޭޝަނާ ހިއްސާކުރުމަށް އެދޭ ކަމަށެވެ. އަދި އެ މައުލޫމާތުތައް 9911099 ނަމްބަރަށް ގުޅައި، ހިއްސާ ކުރުމަށް ވަނީ އެދިފައެވެ.

އެގޮތުން، އެފަދަ މައުލޫމާތެއް ލިބިފައިވާނަމަ މޭޖަރ ކްރައިމް އިންވެސްޓިގޭޝަން ނަންބަރު 9911099 އަށް ގުޅުމަށް ވަނީ އެދިވަޑައިގެންފައެވެ.

އެދުވަހުގެ ހާދިސާގައި ހައުސިންގ މިނިސްޓްރީ އާއި ކޮންސްޓްރަކްޝަން މިނިސްޓްރީ އާއި އެންވަޔަރްމެންޓް މިނިސްޓްރީ ވަނީ އެއްކޮށް އަނދާފައެވެ. އަދި ހައުސިންގ މިނިސްޓްރީ އިމާރާތްތެރޭގައި ހުރި މާލޭ ސިޓީ ކައުންސިލުގެ ވައިޓަލް އެންޑް ރެޖިސްޓްރޭޝަން ސެކްޝަން ވެސް ވަނީ އަނދާފައެވެ.

މި އަލިފާނުގެ ހާދިސާ ހިނގަން މެދުވެރިވިގޮތް ދެނެގަތުމަށް ދިވެހި ފުލުހުންގެ ހިދުމަތާއި އެމްއެންޑީއެފްގެ ފަޔަރ އެންޑް ރެސްކިއު ސަރވިސަސް ގުޅިގެން މިހާރުވެސް މަސައްކަތް ކުރަމުން އަންނައިރު، މި ހާދިސާގެ ފުރިހަމަ ތަހްގީގެއް ކުރާނެކަމަށް ސަރުކާރުން ވަނީ ވިދާޅުވެފައެވެ. އަދި ރާއްޖެއިން ބޭރުގެ ތަހުގީގު ޓީމެއް ގެނައުމަށް ވެސް ވަނީ ނިންމާފައެވެ.

މި ހާދިސާއާ ގުޅިގެން އެންމެ ފުރަތަމަ މަންޒަރު ދުށް މީހުންގެ ބަޔާންތައް ނެގުމުގެ މަސައްކަތާއި ހާދިސާގެ މައުލޫމާތު އެންމެ ފުރަތަމަ ލިބޭނެ ކަމަށް ގަބޫލުކުރެވޭ މީހުންނާ ސުވާލުކުރުމުގެ މަސައްކަތް ވެސް ފުލުހުން ދަނީ ކުރައްވަމުންނެވެ.