ޕަބްލިކް ސަރވިސް މީޑީއާ (ޕީއެސްއެމް) ގެ މެނޭޖިންގ ޑިރެކްޓަރުގެ މަގާމުގައި ހުންނެވި މުހައްމަދު ސައީދު އެ މަގާމުން އިސްތިއުފާ ދެއްވައިފިއެވެ.

މިއީ ރައީސް ޑރ. މުޙައްމަދު މުޢިއްޒުގެ ސަރުކާރުގެ ޕީއެސްއެމްގެ އެމްޑީގެ މަގާމަށް އައްޔަންކޮށް، އަދި އިސްތިއުފާދެއްވި ދެވަނަ ފަރާތެވެ. މި ސަރުކާރު ވެރިކަމަށް އައިސް، ޕީއެސްއެމްގެ އެމްޑީގެ މަގާމަށް އެންމެފުރަތަމަ އައްޔަން ކުރެއްވީ ޒީނާ ޒާހިރުއެވެ. އެހެންނަމަވެސް އޭނާ އެ މަގާމުން އިސްތިއުފާދެއްވާފައިވާއިރު، އެ މަގާމަށް ސައީދު އައްޔަންކުރައްވާފައިވަނީ މިއަހަރުގެ އޮގަސްޓް މަހުގެ ތެރޭގައެވެ.

ސައީދު އިސްތިއުފާދެއްވާފައިވާކަން ޔަގީންވިނަމަވެސް ސަބަބެއް އަދިނޭނގެއެވެ.

އޭނާ އިސްތިއުފާދެއްވާފައި މިވަނީ ޕީއެސްއެމްގެ ކޮންޓެންޓާ ގުޅޭ މައްސަލަތަކެއް ވެސް ފެންމަތިވެފައިވާ ދުވަސްވަރެއްގައެވެ.

އެގޮތުން މޯލްޑިވްސް މީޑިއާ ކައުންސިލުގެ 11 ވަނަ ނޫސްވެރިކަމުގެ އިނާމު ދިނުމުގެ ހަފުލާގައި ގެނެސްދިން ރިޕޯޓެއްގެ މައްސަލައާއި ޕީއެސްއެމުން ވަގުތުން ގެނެސްދިން އިވެންޓެއްގައި ގުރްއާނުން ބައެއް އުނިވީ ކަމަށް ބުނެ މިދިޔަ ބުރާސްފަތި ދުވަހު ރައްޔިތުންގެ މަޖިލީހަށް ކުއްލި މައްސަލައެއް ހިމެނެއެވެ. އަދި އިނގިރޭސި ޚަބަރުގެ ސެގްމަންޓެއްގައި ބޭއަދަބީ މަންޒަރެއް ދެއްކި މައްސަލައެއް ވެސް ވަނީ ފެންމަތިވެފައެވެ.

މީގެތެރެއިން އެމްއެމްސީގެ މައްސަލަ ބަަލައިދިނުމަށް އެ އިދާރާ އަށް ހުށަހަޅާފައިވާއިރު، ގުރްއާނުން ބައެއް އުނިވީ ޓެކްނިކަލް މައްސަލައެއްގެ ސަބަބުން ކަމަށާއި އެ ކަމުގައި އިހުމާލުވި މުވައްޒަފުން ވަޒީފާގެ މަސްއޫލިއްޔަތުތަކުން އެކަހެރިކޮށްފައިވާ ކަމަށް ސައީދު ވަނީ ވިދާޅުވެފައެވެ. އަދި އިނގިރޭސި ޚަބަރުގެ ސެގްމަންޓެއްގައި ބޭއަދަބީ މަންޒަރެއް ދެއްކި މައްސަލައިގާ ދެ މުވައްޒަފަކު ސަސްޕެންޑު ކުރިކަމަށް ވިދާޅުވެފައި ވެއެވެ.